Júzdesý barysynda birneshe sala boıynsha ózara yntymaqtasý máseleleri talqylandy. Olardyń ishinde Qazaqstanda valútany retteý, Qazaqstan men Qytaı arasynda qolma-qol aqsha aınalymy, Qazaqstannyń Ulttyq banki men Qytaı Halyq banki arasynda aqparat almasý máselelerin ataýǵa bolady.
Odan basqa, eki el arasynda tólem júıesi men ózara esep aıyrysýdy damytý jaıy qozǵaldy. Sondaı-aq, Qazaqstan qor bırjasynda ıýán/teńge, baǵaly qaǵazdar jáne basqa da qarjy quraldarynyń saýdasy jóninde talqylandy.
Áńgimelesý kezindea Qytaı Halyq banki Shyńjań fılıalynyń prezıdenti Go Szánveı men Qytaı Halyq banki Monetarlyq saıasat departamenti Bas dırektorynyń orynbasary Chjoý Chenszún Qazaqstannyń Ulttyq banki men Qytaı Halyq banki arsyndaǵy yntymaqtastyqty odan ári damytýǵa negiz bar ekendigin atap ótti.
«Bul yntymaqtastyq eki el úshin strategıalyq mańyzǵa ıe. Onyń damýyna taıaýda Qazaqstan Prezıdentiniń Qytaı Halyq Respýblıkasyna jasaǵan memlekettik sapary oń áser etti. Sol kezde qol qoıylǵan kelisimder qytaılyq jáne qazaqstandyq kompanıalar úshin óte mańyzdy», - desti qonaqtar.
Go Szánveıdiń aıtýynsha, eki el arasyndaǵy taýar aınalymy kóleminiń ósýi esep aıyrysý operasıalaryna ulttyq valútlardy, ınvestısıany qoldanýǵa múmkindik beredi.
«Ótken jyly, biz shekara mańynda saýda júrgizý boıynsha esep aıyrysý operasıalary týraly kelisimge qol qoıdyq. Qazaqstan qor bırjasynda ıýán-tenge jubynyń saýdasy ashyldy. Bul qazaqstandyq jáne qytaılyq kompanıalardyń ózara yntymaqtasýyna jol ashady. Onyń ústine qazir Qazaqstan men Qytaıdyń ınvestısıalyq kompanıalaryna dollar emes, ıýán nemese teńgeni qoldanǵan qolaıly. Sondaı-aq, eki eldiń ortalyq bankteri arasynda valútalyq svop boıynsha ortaq kelisimge qol qoıylǵan. Iaǵnı, eger bizdiń elderimizde ıýán nemese teńge jetkiliksiz bolsa, onda ulttyq valútany qajetti mólsherde alý úshin biz bir-birimzge ótinim bere alamyz», - dedi Go Szánveı.
Odan basqa, kezdesý barysynda Qytaı Halyq bankiniń ókilderi «Astana» Halyqaralyq qarjy ortalyǵy jobasynyń mańyzdylyǵyn atap ótti.
«QR Ulttyq bankiniń bul Ortalyqty damytýǵa barlyq resýrstary jetedi. Jáne eń bastysy, muny Qazaqstan Prezıdenti qoldap otyr. Sondyqtan bize sizderge tabystar tileımiz», - dedi Qytaı Halyq banki Monetarlyq saıasaty departamenti Bas dırektorynyń orynbasary Chjoý Chenszún.
Taraptar aldaǵy ýaqytta da osyndaı kezedsýler ótkizýdiń mańyzdy ekendigin atap ótti.
