İs-sharaǵa Tájikstan Respýblıkasynyń Prezıdenti E.Rahmon, Armenıa Respýblıkasynyń Prezıdenti S.Sargsán, Belarýs Respýblıkasynyń Prezıdenti A.Lýkashenko, Qyrǵyz Respýblıkasynyń Prezıdenti A.Atambaev, Reseı Federasıasynyń Prezıdenti V.Pýtın, UQSHU bas hatshysy N.Bordúja, sondaı-aq uıymǵa múshe elderdiń qorǵanys jáne syrtqy saıasat vedomstvolary basshylary qatysty. Bul týraly "Qamshy" portaly Aqorda.kzke silteme jasaı otyryp habarlaıdy.
Kezdesý barysynda óńirdegi ujymdyq qaýipsizdik júıesin nyǵaıtý, uıym qyzmetiniń tıimdiligin arttyrý máseleleri jáne jedel áreket etetin ujymdyq kúshterdiń oqý-jattyǵýyn ótkizý nátıjeleri talqylandy.
Memleket basshysy óz sózinde uıymnyń kún tártibindegi negizgi máselelerdiń biri halyqaralyq terorızm men ekstremıstik uıymdardyń tóndiretin yqtımal qaterleri ekenin atap ótti.
Moıyndaýymyz kerek, ókinishke qaraı, UQSHU-ǵa múshe memleketterdiń jekelegen azamattary osyndaı radıkaldy qurylymdarǵa qosylyp, zańǵa qaıshy is-áreketterge qatysý úshin Taıaý Shyǵystaǵy jáne Aýǵanstandaǵy soǵys oshaqtaryna baryp jatady. Bul jaıt bizdiń tarapymyzdan qarsy is-qımyl jasaýdyń tıimdi sharalaryn qabyldaýdy talap etedi, – dedi Nursultan Nazarbaev.
Qazaqstan Prezıdenti Tájikstan halyqaralyq lańkestikke qarsy kúrestiń aldyńǵy shebinde ekenin nazarǵa ala otyryp, barlyq elder álemdik ekonomıkadaǵy qıyndyqtarǵa qaramastan aldaǵy ýaqytta da osy odaqtasymyzǵa ekonomıkalyq kómek kórsetýge tıis ekenin atap aıtty.
Qazaqstan bıyl baýyrlas elge 2,7 mıllıon dollardyń azyq-túligi men qurylys materıaldaryn jiberdi, – dedi Memleket basshysy.
Sonymen qatar, Nursultan Nazarbaev sesıaǵa qatysýshylar nazaryn Aýǵanstandaǵy jaǵdaıǵa aýdardy.
Aýǵanstannyń soltústigindegi sodyrlar belsendiligi aıryqsha alańdatady. Aýǵan aýmaǵynan tónetin qaýip-qaterlerge qarsy tıisti áreket etý úshin UQSHU aıasyndaǵy birlesken kúsh-jigerdi ekijaqty negizde de, ózge halyqaralyq uıymdarmen aradaǵy jumystar barysynda da arttyra túsý qajet. Qazaqstan Kabýlǵa jyl saıyn azyq-túlik, otyn, dári-dármek jetkizý, sondaı-aq aýǵan jastaryn elimizdiń joǵary oqý oryndarynda oqytý arqyly tehnıkalyq jáne gýmanıtarlyq kómek kórsetýdi jalǵastyrýda, – dedi Qazaqstan Prezıdenti.
Memleket basshysy bizdiń el óńirdegi jaǵdaıdyń kúrdeli ekenin eskere otyryp, UQSHU jedel áreket etetin ujymdyq kúshteriniń jaýyngerlik qabiletin arttyrýǵa baǵyttalǵan sharalardy qoldaıtynyn aıtty.
Qazaqstan Jedel áreket etetin ujymdyq kúshter arnaýly qurylymdarynyń áskerı kontıngentiniń jaýyngerlik jáne qyzmettik daıyndyǵyn artyrý qajettigin qoldaıdy. Oqý-jattyǵýlardy, sonyń ishinde tótenshe tekserýlerdi de únemi ótkizip otyrý qajet dep sanaımyz, – dedi Nursultan Nazarbaev.
Qazaqstan Prezıdenti sesıa sheshimderiniń jobalary arasynan áskerı kontıngentterdiń, qarý-jaraqtyń, tehnıkanyń UQSHU-ǵa múshe elder aýmaǵy arqyly qozǵalysyn naqty retteıtin Áskerı jáne ózge qurylymdardy tasymaldaý salasyndaǵy yntymaqtastyq týraly kelisimdi aıryqsha atap kórsetti.
Sońynda Nursultan Nazarbaev sharaǵa qatysýshylardy Qazaqstannyń UQSHU aıasyndaǵy barlyq mindettemelerdi múltiksiz oryndaıtynyna, sondaı-aq odaqtas elderge qajetti gýmanıtarlyq kómek kórsete beretinine sendirdi.
