Almatyda Ońtústik Qazaqstan oblysy jáne Almaty qalasy ákimdiginiń uıymdastyrýymen óńiraralyq yntymaqtastyqty damytý bıznes forýmy ótti. Bul týraly "Qamshy" portaly Aıqynǵa silteme jasaı otyryp habarlaıdy.

Bıznes-forým sheńberinde jýrnalısermen kezdesken Ońtústik Qazaqstan oblysy ákiminiń orynbasary Saparbek Tuıaqbaev alma­tylyqtarmen árqashanda birlesip jumys isteýge daıyn ekenin, aldaǵy ýaqytta ol eki baǵytta jalǵasa beretinin aıtty. Birinshisi – Ońtústik Qazaqstan oblysynyń logıstıkalyq ortalyǵyn ashý arqyly ońtús­tiktiń kókónisin Almatyǵa qoljetimdi baǵada jetkizip, kókónis ım­portyna táýeldiliktiń yqpalyn álsiretý. Sebebi, ońtústikte baqsha da­­qyldaryn ósirýge mamandanǵan sharýashylyqtar jyl ótken saıyn artyp keledi. Eger bul júıe iske assa, osy baǵytta segiz ortalyq ashy­lady. Ekinshisi – almatylyq ınvestorlardyń nazaryn ońtústik­tiń áleýetine aýdarý. Qazir ońtústikte ındýstrıaldy aımaqtardy orna­lastyrýǵa bólingen jer telimderiniń jalpy kólemi 813,5 gektarǵa jetipti. Onda jaqyn bolashaqta jalpy quny 60 mlrd. 969 mln teńgeni quraıtyn 40 ınvestısıalyq joba iske asyrylady. 
Jalpy, Ońtústik Qazaqstanda 19 ındýstrıalyq aımaq qury­lýda. Búginde onyń tórteýi Shymkentte iske assa, jalpy kólemi 153 ga quraıtyn 2 ındýstrıalyq aımaq Túrkistan qalasy men Sozaq aýda­nyn­da paıdalanýǵa berilip otyr. Jyl sońyna deıin «Ońtústik» ın­dýstrıalyq aımaǵyn qosqanda bul kórsetkish 12-ge artsa, 2016-2017 jyldary aýdan, qalalarda 7 ındýstrıalyq aımaqtyń qurylysy aıaq­talmaq. Olardyń qatarynda Arys qalasy, Saıram, Saryaǵash, Oty­rar, Tólebı, Ordabasy aýdandaryndaǵy ındýstrıalyq aımaqtar men Shymkent qalasy mańyndaǵy agro-ındýstrıalyq aımaǵy bar. Osy­laı­sha, óńirde ónerkásiptik óndiris pen bıznes úshin 975 gektar aýmaqta daıyn ónerkásiptik alańdar qalyptaspaq. 
– Qazirgi tańda ınfraqurylym qurylysynyń tórt kezeńi toly­ǵymen aıaqtaldy. Indýstrıaldyq aýmaqtyń birneshe artyqshylyǵy bar. Birinshiden, «Ońtústik» ındýstrıaldyq aýmaq dıreksıasy kásipkerlerge «bir tereze» ustanymy boıynsha qyzmet kórsetedi. Ekinshiden, aýmaq kásiporyndary komýnıkasıalyq ınfraqu­ry­lymmen tegin qamtamasyz etiledi. Úshinshiden, ındýstrıalandyrý kartasyna kirgen ınvestısıalyq jobalarǵa jer telimderi jeke- menshikke konkýrssyz beriledi. Tórtinshiden, elektr qýaty 25 paıyz arzan. Besinshiden, qaıta qurylyp jatqan kásiporyndarǵa qajetti maman daıyndaý úshin qaıta daıarlaý ortalyqtary jumys júrgizýde. Altynshydan, yńǵaıly logıstıkalyq júıe qurastyrylǵan. Magı­stralǵa jaqyn temirjolmen qamtamasyz etilgen. Mine, osy artyq­shylyqtar elimizdiń ǵana emes, sheteldik ınvestorlardy da qyzyqty­ryp otyr. Mundaǵy ilkimdi isterdi Elbasy Nursultan Nazarbaev ta joǵary baǵalap, shaǵyn kásipkerlikti damytýdaǵy bas­tamalarǵa qoldaý bildirgen bolatyn. Shymkenttiń irgesindegi 92 gek­tar jerge salynyp jatqan ortalyqta jalpy syıymdylyǵy 230 myń sharshy metrden asatyn halyqaralyq standarttarǵa saı qoımalar salynady. Bul óz kezeginde aýylsharýashylyǵymen aınalysatyn dı­qandarǵa qolaı­ly bolmaq. Óıtkeni sharýalar ónimderin qalaýynsha saqtap, qajet ýaqytynda saýdaǵa shyǵara qoıady. Onyń ústine ortalyq áýejaı men tranzıttik temirjol jáne «Batys Eýropa – Batys Qytaı» kólik dálizine jaqyn ornalasqan. Jalpy quny 24 mlrd teńgeni qu­raıtyn 8 ınves­tısıalyq joba júzege asyp jatqan aımaqqa qajetti ınfra­qurylymdy memleket júrgizip bergen. Ortalyq óńirdegi qoı­maǵa su­ranystyń 45%-yn jabady. Jańadan 726 jumys orny ashyl­maq,– deıdi Ońtústik Qazaqstan oblysy ákiminiń orynbasary Saparbek Tuıaqbaev. 
Aımaqtar dástúrli saýdasy damyǵan kóne jádigerleri kóp Túrki­stan men aq altynnyń mekeni Maqtaaral, sondaı-aq shıpaly sýy bar Saryaǵash aýdandarynda boı kótermek. Ol jerlerde jergilikti ın­vestorlardyń kúshimen jalpy aýmaǵy 80 myń sharshy metr bolatyn qoımalar salynady dep josparlanyp otyr. Qosymsha týrızmdi da­mytý jaǵy da qaralǵan. 
– Infraqurylymnyń qurylysyn kelesi jyly bastaýdy jos­parlap otyrmyz. Buǵan da ınvestorlar qyzyǵýshylyq tanytyp otyr. Bul osy aýdandardyń ári qaraı óndirisiniń de, eksporttyq áleýetiniń de damýyna óz áserin tıgizbek, – deıdi Saparbek Tuıaqbaev.