Depýtat Halmuradov Qarjy mınıstrinen EKSPO kórmesine qosymsha 35 mlrd teńgeniń ne úshin bólinetinin surady

Depýtat Rozaqul Halmuradov 2017 jyly ótetin EKSPO halyqaralyq kórmesine 2018 jyly nelikten taǵy da 35 mlrd teńge bólinip otyrǵanyn túsinbeı álek. Bul týraly búgin ol Májiliste «2016-2018 jyldarǵa arnalǵan respýblıkalyq búdjet týraly» zań jobasyn tanystyrǵan QR Qarjy mınıstri Baqyt Sultanovtan surady. Bul týraly "Qamshy" portaly Baq.kz-ke silteme jasaı otyryp habarlaıdy.
 

B.Sultanov baıandamasynda 2016-2018 jyldarǵa arnalǵan jańa búdjette EKSPO-2017 halyqaralyq kórmesin ótkizýge 306 mlrd teńge qarastyrylǵanyn jetkizdi. Buǵan depýtat Rozaqul Halmuradov óz narazylyǵyn bildirdi.

– EKSPO-2017 halyqaralyq kórmesine 2016 jylǵa 173 mlrd, 2017 jylǵa 98 mlrd teńge qarjy bólingen. Kórme 2017 jyly aıaqtalady. Kórmeniń barlyq qurylystaryn 2016 jyldyń sońyna deıin bitirý kerek degen Elbasynyń tapsyrmasy bar. Ne sebepten osy kórmege 2018 jyly 35 mlrd teńge qarjy qarastyrdyq? Ulttyq kompanıadan urlanǵan qarjynyń ornyn toltyrý úshin salyp otyrmyz ba? Kórme bitse, biz nege taǵy qarjy salamyz? 3,5 mlrd bolsa túsiner edik, áńgime 35 mlrd jóninde bolyp otyr, - dedi ol

Depýtattyń suraǵyna jaýap bere otyra, Qarjy mınıstri Baqyt Sultanov EKSPO-2017 kórmesiniń iri joba ekenin alǵa tartty.

– Bul bir kúnde, bir jylda jasalatyn joba emes. Kelesi jylǵa qarastyrylǵan 173 mlrd teńge negizgi qurylystardy aıaqtaýǵa kózdelip otyr. 2017-2018 jyldary qarajat uıymdastyrýǵa bólinedi. Óıtkeni, qurylyspen jumys bitpeıdi ǵoı, odan arǵy jumystary da bar. Qurylys bitkenennen keıin, memleketterge pavılondar daıyndaý kerek, osy sekildi jumystarǵa kózdelgen. Tereńirek baǵyttardy aıtyp berý kerek bolsa, Ulttyq ekonomıka mınıstrliginiń ókilderi otyr, jumys tobynyń otyrysynda da tolyǵyraq aıtyp bere alamyz, - dedi mınıstr.