Kezdesý barysynda Sverdlov oblysynyń gýbernatory E.Kýıvashev eki eldiń arasyndaǵy tatý kórshilik qarym-qatynastardy damytýǵa jáne shekaralyq óńirler arasyndaǵy baılanystardy nyǵaıtýǵa qosqan zor úlesi úshin Qazaqstan Prezıdentine alǵys aıtty. Bul týraly "Qamshy" portaly Aqorda.kzke silteme jasaı otyryp habarlaıdy.

Al Ýral federaldyq ýnıversıtetiniń rektory V.Koksharov Nursultan Nazarbaevqa memlekettik qyzmettegi aıryqsha eńbegin baǵalaýdyń belgisi retinde Qurmetti doktor dıplomyn tapsyrdy. Ol sondaı-aq Memleket basshysyna birlesken birqatar ınovasıalyq jobalar boıynsha Qazaqstannyń joǵary oqý oryndarymen yntymaqtasyp otyrǵanyn, bul jobalar tanystyrylymy Astanadaǵy «EKSPO-2017» halyqaralyq kórmesinde ótetinin aıtty.

Áńgime barysynda Nursultan Nazarbaev Sverdlov oblysy men Ýral federaldyq ýnıversıteti Qazaqstan men Reseı halyqtary arasyndaǵy tyǵyz dostyq qarym-qatynastardy nyǵaıtýda zor ról atqaryp otyrǵanyn atap ótti.

Sizdiń ýnıversıtet ındýstrıalyq aımaqtardyń kadrlyq áleýetin qalyptastyrý jáne damytý isine Reseıde ǵana emes, bizdiń elde de zor úles qosyp otyr. Meniń bilýimshe, búginde Qazaqstannan 700-ge jýyq stýdent B.Elsın atyndaǵy Ýral federaldyq ýnıversıtetinde bilim alýda. Qazaqstannyń jetekshi joǵary oqý oryndarymen ýnıversıtettiń yntymaqtastyq týraly kelisimi bolǵany mańyzdy, – dedi Memleket basshysy.

Qazaqstan Prezıdenti múmkindik týǵan jaǵdaıda ýnıversıtet stýdentteri men oqytýshy-professorlar quramy aldynda dáris oqýǵa daıyn ekenin de málimdedi.