Aqmola oblysynyń Ereımentaý aýdanynda psıhologıalyq-pedagogıkalyq túzetý kabınetinde 910 bala ońaltýdan ótti. Bul týraly «Nur Otan» partıasynyń oblystyq fılıalynyń baspasóz qyzmetinen habarlady. Bul týraly Qamshy portaly inform.kz-ke silteme jasaı otyryp habarlaıdy.

«Kedergisiz keleshek» jáne «Baqytty balalyq» jobalary sheńberinde partıanyń Ereımentaý aýdandyq fılıaly psıhologıalyq-pedagogıkalyq túzetý kabınetinde múmkindigi shekteýli balalarmen kezdesý uıymdastyrdy.

Kabınet meńgerýshisi «Nur Otan» partıasynyń múshesi Aıgúl Hasenovanyń aıtýynsha, aýdanda múmkindigi shekteýli balalardyń tálim-tárbıe alýy úshin barlyq jaǵdaı jasalynǵan. 

«Balalar úshin túrli qyzyqty ári tartymdy is-sharalar ótkizip turamyz. Tárbıelenýshilerimiz oblystyq baıqaýlarǵa qatysyp, árdaıym júldeli oryndardan kórinýde», - deıdi Aıgúl Hasenova.

Qazirgi tańda búldirshinder qazan aıynyń sońynda Kókshetaýda ótetin múmkindigi shekteýli balalarǵa arnalǵan «Juldyzaı» baıqaýyna daıyndyq ústinde.

Jyl basynan beri logoped, psıholog, emdeý-fızıkalyq tárbıe jónindegi nusqaýshy, áleýmettik oqytýshy mamandarymen 50-den astam balalarǵa kómek kórsetildi.

Eske sala ketsek, atalǵan «Psıhologıalyq-pedagogıkalyq túzetý kabıneti» KMM osyndan 11 jyl buryn jergilikti mektep-ınternaty negizinde ashylǵan bolatyn. Sodan beri munda 910 bala ońaltýdan ótti. 2013 jyly mekemege jeke ǵımarat bólingen bolatyn.