Osydan biraz buryn jazǵanymyzda, Almaty oblysyndaǵy tátti túbir ósirýshilerdiń bıylǵy ónimin qabyldap, qaıta óńdeýden ótkizýge tıisti birden-bir kásiporyn – «Kóksý qant zaýyty» jaýapkershiligi shekteýli seriktestigi aldaǵy naýqanǵa tolyq daıyn ekeni jóninde aıtqan edik. Bul týraly Qamshy portaly Aıqyn-Aqparatqa silteme jasap habarlaıdy.
Kúni keshe atalǵan kásiporynǵa Almaty oblysynyń Tal­dy­qorǵan aımaǵyndaǵy aýdandarda, naqtyraq aıtqanda, Eskeldi, Sarqan, Aqsý aýdandarynda ósirilgen qant qyzylshasynyń al­ǵashqy ónimin tıegen úlken kerýen kelip jetti. 
Bıyl qant qyzylshasyn ósirýshiler jıyn-terim naýqa­ny­na úlken úmit artyp otyr. Erte kóktemnen bastap, olarǵa mem­leket, oblys, aýdan tarapynan barlyq qamqorlyq pen qoldaý jasaldy. Tuqymmen, tyńaıtqyshpen, janar-jaǵarmaımen qamtamasyz etýde irkilis bolǵan joq. Tátti túbirdiń ár gektaryna 60 myń teńgeden demeýqarjy tólenetini, alynǵan ónimniń ár tonnasy 13 myń teńgeden qabyldanatyny jóninde de jıi aıtylǵan edi. Ýádege sengen dıqandar ala jazdaı alqapta aıan­bastan ter tókti. Taban et, mańdaı terleri aqtalyp, bıylǵy kúzderi berekeli bolyp tur. Dál qazirgi kezde alǵashqy jınalǵan alqaptar men ótkizilgen ónimdi eseptegende, ortasha alǵanda, gektarynan 350-400 sentnerden tátti túbir jınalýda. Sonymen birge qant zaýytynyń qabyldaý alańyna tógilgen qant qy­zyl­shasynyń iriligi de kózge birden baıqalady. Ortasha alǵanda ár dana tátti túbirdiń salmaǵy 1,5 kelige jýyqtaıtyn kórinedi. Aldaǵy aptalar qazirgiden de ónimdi bolady degen úmit zor. Má­se­len, 25 gektar jerge qant qyzylshasynyń tuqymyn sińir­gen, erte kóktemnen qońyr kúzge deıin bel jazbaǵan Sarqan aýda­nyndaǵy «Aqqudyq» sharýa qojalyǵynyń jetekshisi Serikjan Esimjanov alǵashqy ónimniń kólemi men sapasyna sa­raptama jasaı otyryp, qorytyndysynda ár gektardan 650-700 sentnerden aınalýy múmkin dep boljap otyr.