Jahandyq básekege qabiletti elderdiń reıtıńinde Qazaqstan Reseıdiń aldyna shyqty dep habarlaıdy Tengrinews.kz Dúnıejúzilik ekonomıkalyq forýmǵa (DEF) silteme jasap. Atalǵan tizimde Qazaqstan 4,5 balmen 42-shi orynǵa jaıǵassa, Reseı 45-shi satyda. Bizdiń el ótken jylmen salystyrǵanda segiz satyǵa joǵarylaǵan. Bul týraly Qamshy portaly Baq.kz –ke silteme jasaı otyryp habarlaıdy.

Bıyl Qazaqstan básekege qabilettiligi jaǵynan Italıa men Polshanyń arasynda. Elimiz Reseı, Latvıa, Fılıppın jáne Túrkıa syndy memleketterdi artta qaldyrdy. Al, tizimniń birinshi ornyn osymen jetinshi jyl qatarynan Shveısarıa eshkimge bermeı keledi. Ekinshi orynda - Sıngapýr, úzdik úshtikti AQSH qorytyndylaǵan. Germanıa bolsa besinshi orynnan tórtinshige joǵarylasa, Nıderlandy segizden besinshi orynǵa bir-aq sekirdi.

DEF ázirlegen básekege qabiletti elder reıtıńiniń alǵashqy ondyǵynda Japonıa, Gonkong, Fınlándıa, Shvesıa jáne Ulybrıtanıa bar. Qytaı bolsa bul tizimniń 28-shi satysynda.

Esterińizge salaıyq, 2013 jáne 2014 jyldary Qazaqstan básekege qabiletti elder arasynda 50 orynnan kóringen bolatyn. Segiz satyǵa joǵarylaýymyzǵa elimizdegi jekemenshik sektordyń damýy, jańa jumys oryndarynyń ashylýy, naryqtaǵy básekelestik saıasatynyń damýy sekildi birneshe faktor sebep bolǵan.