Qazaqstan káristeri birlestigi tóraǵasynyń keńesshisi Georgıı Kan assambleıa aıasyndaǵy áleýmettik máseleler boıynsha iske asyrylyp jatqan jumystar men jobalar týraly sóz qozǵady. Bul týraly Qoǵamdyq kelisim uıymy jumysynyń 9 aıdaǵy qorytyndysy men prezıdent joldaýyna oraı etnomádenı ortalyqtarǵa qoldaý kórsetý sharalary týraly ótken Almatydaǵy ortalyq komýnıkasıalar qyzmetindegi brıfıń barysynda málim etti.

"Árbir ult ókili óz aınalasyndaǵy áleýmettik máselelerden habardar ekeni málim. Uıǵyrlar bolsyn, nemister bolsyn, qazaqtar bolsyn aınalasynda kimniń áleýmettik jaǵdaıy tómen ekenin jaqsy biledi. Mysaly, bir aýylda bir aqsaqal jalǵyz turady delik. Áleýmettik qyzmetkerlerdiń bul týraly habarsyz bolýy múmkin. Memlekettik qyzmetkerlerdiń de jumysy aýyr, kóp bolǵandyqtan bul kisi týraly bilmeıtin bolýy múmkin. Sol sebepti barlyq etno-mádenı birlestik óz qyzmeti aıasynda osyǵan uqsas máselelerdi sheshýge atsalysady. Ásirese pandemıa kezeńinde mundaı jaǵdaıdy jıi bastan ótkerdik. Pandemıa áleýmettik qyzmetkerler úshin úlken synaq emtıhany sekildi boldy. Sebebi psıhologıalyq jáne moraldyq aýyr sátte arnaıy daıyndyqtan ótken áleýmettik qyzmetkerlerdiń ózi abyrjyp qaldy. Adamdar kóshege shyǵýǵa qoryqty. Osy jaǵdaıda assambleıa aıasynda arnaıy mobıldik toptar jasaqtaldy. Olar kómekke muqtaj adamdarǵa azyq-túlik aparyp, dári-dármekpen qamtamasyz etti. Dári de jetispeı jatqan, azyq-túlikke barýdyń ózi qorqynyshty boldy. Tipti Káris teatryndaǵy qyzmetkerlerge medısınalyq maska jetispeı jatty. Buǵan uqsas ondaǵan mysal keltirýge bolady. Dárihanada qarapaıym partestamol dárisiniń baǵasy qymbattap ketti. Sol sebepti bizge shuǵyl kómek kórsetetin arnaıy mobıldik toptar qajet boldy. Men etnomádenı birlestik ókilderi bul jumysty abyroımen atqarǵanyn úlken senimmen jáne maqtanyshpen aıta alamyn", deıdi Georgıı Kan. 

Qazaqstan káristeri birlestigi tóraǵasynyń keńesshisi Georgıı Kan qańtar oqǵıǵasynda árbir etnos ókilderi úshin birlik pen qoldaý mańyzdy bolǵanyn aıtty. 

"Biraq araǵa ýaqyt salyp qańtar oqıǵasy oryn aldy. Almatyda tótenshe jaǵdaı jarıalandy. Qaıtadan úlken qıyndyqty bastan ótkerdik. Pandemıa kezinde assambleıa birlestikteri "Antıkovıd" atty aksıa ótkizgen edi. Sol sekildi qańtar oqıǵasynda barynsha óz tarapymyzdan kómek kórsetýge tyrystyq. Qaraly qańtar etno-mádenı birlestik ókilderi bir-birine qoldaý kórsetip, hal-jaǵdaı surasty. Munyń ózi úlken qoldaý, kómek dep bilemin. Árbir etnos ókili qıyn jaǵdaıǵa tap bolǵan kezde etno-mádenı birlestik ókilderine habarlasyp, kómek suraıdy. Árıne biz shamamyz kelgenshe kómek kórsetýge tyrysamyz. Qańtar kezinde Almatyǵa kelip qıyn jaǵdaıǵa tap bolǵan etnos ókilderine kómek kórsetken kezder bolǵan. Al qazir biz osyndaı qıyndyqtardy artqa tastap, jańa Qazaqstandy birge qurýǵa úles qosqaly otyrmyz", deıdi ol.