Jıynda 60 paıyzy tozǵan avtobýs parkin jańartý máselesi sóz boldy. Osy oraıda oblys ortalyǵy men aýdandarǵa qatynaıtyn 120 avtobýs satyp alý josparlanýda.

Oblystaǵy jolaýshylar tasymalyn qaýipsiz, qolaıly ári sapaly etý maqsatynda «Kaspıı» ÁKK» AQ» otandyq jańa avtobýstardy satyp alýdy usynyp otyr. Eger avtobýs parki jańartylsa, oblysta 460 jańa jumys orny ashylady.

Oblys ákimi Nurlan Noǵaev avtobýs parkiniń jańartylýy turǵyndarǵa jaıly jaǵdaı jasap qana qoımaı, elimizdiń mashına jasaý salasyn damytýǵa da septigin tıgizetinin atap ótti.

– Qoǵamdyq kólik qyzmetiniń sapasyn arttyrý – kún tártibindegi ózekti máselelerdiń biri. Turǵyndar tasymaldaýshylardyń jumysyna jıi shaǵymdanady. Sondyqtan oblystyń barlyq aýdanyna qoǵamdyq kólik satyp alý máselesin qarastyrý qajet. Avtobýstar aýyl arasynda úlken suranysqa ıe bolatynyna senimdimin, – dedi Nurlan Noǵaev.

Otandyq óndiristegi avtobýstar Qaraǵandy oblysynda qurastyrylady. Ekologıalyq taza ónim, metanmen jumys isteıdi.

Aýdandaralyq «Aqtaý-Batyr2-Aqtaý», «Aqtaý-Jetibaı-Aqtaý», Aqtaý-Quryq-Aqtaý» jáne «Aqtaý-Taýshyq-Aqtaý» baǵyttaryna, Munaıly aýdanishilik «Mańǵystaý-Batyr-Mańǵystaý» jáne «Mańǵystaý - Baıandy- Mańǵystaý» baǵyttaryna avtobýs shyǵarý josparlanýda. Sonymen qatar Aqtaý qalalyq №1, №6, №9 jańadan turaqty marshrýttar ashý josparlanýda. Odan bólek jobada Aqtaý-Beıneý-Aqtaý, Aqtaý-Jańaózen-Aqtaý baǵyttaryn jańa qoǵamdyq kólikpen qamtamasyz etý qarastyrylǵan.