20 aqpanda Mańǵystaý oblysynyń ákimi Nurlan Noǵaev Qaraqıa aýdanyndaǵy Quryq aýylyna bardy. Turǵyndarmen kezdesý ótkizip, azamattardy jeke qabyldady, - dep habarlaıdy Mańǵystaý oblysy ákiminiń baspasóz qyzmeti.

36 myńnan astam turǵyny bar Qaraqıa aýdany qarqyndy damyp jatyr. Aýdanda 16 orta mektep, úsh qosymsha bilim berý uıymy, kolej jáne sanatorıalyq tıptegi mektep-ınternat bar.

Byltyr Quryq porty arqyly 1,8 mıllıon tonna júk tasymaldandy. Avtomobıl kóligimen 618 myń tonna júk kóligi jóneltildi. Al «Bolashaq» stansıasy arqyly barlyǵy 2,2 mıllıon tonna júk, 2021 jyly 1,3 mıllıon tonna júk tasymaldandy.

Sonymen qatar 2022 jyly aýyl sharýashylyǵy salasy jaqsy kórsetkishtermen aıaqtaldy. Aýyl sharýashylyǵy janýarlarynyń asyl tuqymdy mal azyǵyna ketetin shyǵyndardy azaıtý úshin 84 sharýashylyqtyń 14-ine 21,8 mln.teńge tólendi. Bıyl naýryzda qalǵan 70 sharýa qojalyǵyna qarjy beriledi.

Qaraqıa óńirinde kásipkerlik te qarqyndy damýda. Memlekettik baǵdarlamalar aıasynda joba usynǵan 49 azamat jalpy somasy 1 mlrd teńge nesıe aldy. Nátıjesinde 100-den astam jumys orny ashyldy. Sondaı-aq atalǵan baǵdarlama aıasynda jańa bıznes-ıdeıalardy júzege asyrý úshin 67 adam 89,6 mln teńge kóleminde qaıtarymsyz grant aldy.

2023 jyly Quryq, Jetibaı, Senek aýyldarynda «Aýyl halqynyń tabysyn arttyrý» pılottyq jobasyn júzege asyrý josparlanyp otyr. Eger joba oryndalsa, aýyl turǵyndary tıimdi sharttarmen shaǵyn nesıe alady. Osylaısha, jumys istep, tabys arttyrýǵa, basqa da aýyl turǵyndaryn jumyspen qamtýǵa múmkindik bolady.

Qaraqıa aýdanynda respýblıkalyq «Bir aýyl – bir ónim» pılottyq jobasy iske asyp jatyr. Jobanyń basty maqsaty – aýyldaǵy jumyssyzdyqty azaıtý.

Byltyr qaraqıalyq 65 turǵyn memleketten qaıtarymsyz grant aldy. Al Quryq aýylynda 29 adam qarjylaı kómek alyp, jeke kásippen aınalysýda. Sonyń biri - Raýshangúl Qýandyqova. Ol jeke kásipker retinde memleketten 5 mln teńge kóleminde qaıtarymsyz grant alǵan. Qarjyǵa jún óńdeıtin túl toqyma stanogyn satyp aldy. Qazir munda 23 maman jumys isteıdi, mal terisinen 40-tan astam ónim, ıaǵnı bylǵary sómke, taqıa, tápishke, toqyma buıymdaryn jasaıdy.

Kezdesýde Quryq aýylynyń turǵyndary jumyspen qamtý, mal sharýashylyǵy, kásipkerlik, balyq sharýashylyǵyn damytý boıynsha birqatar másele kóterdi.

Aımaq basshysy Kaspıı teńiziniń áleýetin tıimdi paıdalanyp, Mańǵystaý oblysynda balyq sharýashylyǵyn damytýǵa arnaıy baǵdarlama ázirleý qajettigin aıtty.

– Balyq sharýashylyǵyn damytý – oblystaǵy áleýetti baǵyttardyń biri. Úkimet 2030 jylǵa deıin arnaıy baǵdarlama ázirledi. Balyq ósirýmen aınalysatyndarǵa bes túrli sýbsıdıa qarastyrylǵan. Byltyr biz balyq sharýashylyǵy bólimin qurdyq. Osy oraıda eksporttyq áleýetti arttyrýǵa, balyq sharýashylyǵyna ınvestısıa tartýǵa basa nazar aýdarý qajet. Balyq sharýashylyǵynyń damýy qosymsha ónim kólemin arttyrýmen qatar jańa jumys oryndaryn ashýǵa múmkindik beredi, – dedi Nurlan Noǵaev.