Alǵys aıtý kúni – kópultty eldi biriktiretin mereke jyl saıyn 1 naýryzda toılanady. Mereke qarsańynda Almaty ulttyq káris ortalyǵy tóraǵasynyń orynbasary Georgıı Kan jeke ózi úshin alǵys aıtýdyń neni bildiretinin aıtyp berdi, dep habarlady Almaty qalasynyń óńirlik komýnıkasıalar qyzmeti.
«Alǵys kúni men úshin, Qazaqstannyń barlyq káristeri úshin jáne bizdiń otbasylarymyz úshin bul óte meıirim men jylylyqqa toly tól mereke. Óıtkeni 1937 jyly munda kárister jer aýdarylǵan. Olardyń arasynda bizdiń ákelerimiz, atalarymyz bar. Bestóbe taýynyń baýraıynda jádigerlerdi saqtadyq, onda jerkepelerden qalǵan shuńqyrlar, ata-babalarymyzdyń beıitteri bar. Sol jerge «Qazaq halqyna myń alǵys» eskertkishin ornattyq. Bul alǵashqy alǵys eskertkishi, kelip gúl qoıatyn monýmentke aınaldy», - dedi G.Kan.
Spıkerdiń aıtýynsha, atalǵan mereke qıyn kezderi Qazaqstanǵa jer aýdarylǵan ulttardyń bastamasymen týyndaǵan.
«Sol jyldary bizdi senimnen aıyrylǵan adamdar retinde ákelgende qazaqtar bizdiń aman qalýymyzǵa kómekteskenin bala kezimizden estıtinbiz. 1937 jyly qalyń kúzde, qar jaýyp turǵanda, qazaqtar kómektespese, qalaı kún kóretin edik. Sondyqtan bul bizdiń meıirim men jylylyqqa toly tól merekemiz. Alǵys aıtý kúnine biz bastamashy boldyq, qarapaıym rahmet aıtyp, «biz qazaq halqyna rızamyz» dep aıtý kerek! Óıtkeni, bul bizdiń paryzymyz, ony árqashan este ustaýymyz kerek», - dep tolyqtyrdy spıker.
Sonymen birge ol jan tebirenterlik estelikpen bólisti, ony ol erekshe jylylyqpen eske aldy.
«Bıyl jazda Atyraý oblysy, Mahambet aýdany, Beıbarys aýylynda boldyq. Ol jerge kárister 1937 jyly ákelindi. Dalaǵa ákelip tastady, aman qaldy, ómir súrdi, óldi. Ol jerlerde káristerdiń beıitteri bolǵan. Kóbi oqýǵa, jumys isteýge ketti, beıitter qaldy. Sodan bir kóktemde Jaıyq bul beıitterdi shaıa bastady. Men osy jazda sol jaqqa baryp, adamdarmen kezdestim. Jergilikti turǵyndar beıitterdi qaıta jóndep qoıý kerektigin aıtty. Qazaqta «óli razy bolmaı, tiri baımaıdy» degen bar danalyq bar. Olar tirilerge ǵana emes, ólilerge de kómektesti. Men tań qaldym. Biz qazir osy adamgershilik faktini máńgilik etý úshin barlyǵyn jasap jatyrmyz», - dep bólisti G.Kan.
Sondaı-aq spıker osy adamı qasıetterdiń arqasynda búginde Qazaqstan halqy dostyq, birlik pen kelisimde ómir súrip jatqanyn aıta kele, soǵan baılanysty barshany shúkirshilik etýge, ıgi ister jasaýǵa, jaqsy amaldardy esten shyǵarmaý kerektigin eske saldy.
Pikir qaldyrý