1 naýryzda «Kore ılbo» respýblıkalyq káris gazetiniń gazetiniń alǵashqy sanynyń shyqqanyna 100 jyl tolady. Almaty qalasynyń Óńirlik komýnıkasıalar qyzmeti oqyrmandardy redaksıa ujymymen ǵana tanystyryp qoımaı, merzimdi basylymnyń tarıhyna qatysty ǵasyrlyq tarıhy bar jádigerlerdi de kórsetýdi maqsat etip, baspasóz máslıhatyn osy oqıǵaǵa arnaýdy jón kórdi, dep jazady Almaty qalasynyń óńirlik kommýnıkalıalar qyzmeti.

«Gazettiń tarıhy óte baı, ol Reseıdiń qıyr shyǵysynan bastaý alǵan. Mine,  júz jyldan keıin týǵan Qazaqstanymyzda eńbek etip, damyp kelemiz. Bizdiń oıymyzsha, gazettiń Qazaqstanda saqtalyp, damyp kele jatqany – bizdiń memleketimizde qandaı qoǵam baryn, qandaı ulttyq saıasat júrgizilip jatqanyn aıshyqtaıtyn úlken tarıhı qubylys», – deıdi «Kore ılbo» káris respýblıkalyq gazetiniń bas  redaktory Konstantın Kım.

Baıandamashynyń aıtýynsha, gazettiń alǵashqy sany 1923 jyly 1 naýryzda shyǵyp, ol kezde «Senbon» dep ataldy, ıaǵnı Avangard degendi bildiredi. 1937 jylǵa deıin gazet Reseıdiń qıyr shyǵysynda sol aýmaqta turatyn koreılerge arnalyp shyǵyp turdy. Osydan keıin káristerdiń jer aýdarylýyna baılanysty gazet ujymynyń bir bóligi Qyzylordaǵa keldi. Bastapqyda oblystyq mártebege ıe bolǵan gazet birer jyldan keıin respýblıkaaralyq deńgeıde – Qazaqstanda ǵana emes, Keńes Odaǵynyń barlyq respýblıkalarynda jaryq kórdi. 1991 jyly gazet  halyqaralyqı káris «Kore ılbo» gazetine aınaldy, ıaǵnı «Káristerdiń kúndeligi» degendi bildiredi.

Bas redaktor atap ótkendeı, gazet óz atyn saqtap qana qoımaı, memlekettik qoldaýǵa ıe bolyp, Qazaqstannyń búkil medıa keńistiginiń ajyramas bóligine aınalǵan.

«Bizden júz jyl boıy ulttyq mádenıet oshaǵyn qalaı saqtap qaldyńyzdar degen suraqtar jıi qoıylady. Bul jerde káristerdiń patrıotızmi úlken ról atqarady dep oılaımyn. Kárister jer aýdarylǵanda «Senbon» gazetiniń aýylsharýashylyq bóliminiń meńgerýshisi matrısalardy poıyz qorabyna tyǵyp, basyn qaterge tigip, Qyzylordaǵa alyp barǵan. Eger bul matrısalar bolmasa, Qyzylordada bir aı jer aýdarylǵannan keıin káris gazetiniń shyǵýy ekitalaı edi», – dep eske alady koreı bóliminiń redaktory Nam Gen Dá.

Osy rette bas redaktordyń orynbasary Tamara Fazylova gazettiń saqtalýyna úles qosqan birqatar esimderdi atap ótti, solardyń arqasynda basylym búginde 100 jyldyq mereıtoıyna jetip otyr.

«Gazet shyǵa bastaǵan kezden úzdik talanttar men ádebı kúshter basylym úshin baryn saldy. Kezinde «Kore» ádebı qosymshasy bar edi, onda bizde qazir áıgili jazýshylar Aleksandr Kan, Stanıslav Lı boldy, olardyń óleńderi Máskeý ýnıversıtetterinde, Genrıetta Kan jáne t.b. oqylady. Qazir bıik belesti túsirmeı, zaman kóshine ilesýge tyrysamyz», – deıdi T.Fazylova.

«Kore ılbo» gazeti – úlken káris basylymy, onyń oqyrmandary Qazaqstannan tys jerde de bar. Búginde basylym Ońtústik Koreıanyń iri BAQ-tarymen yntymaqtasady jáne Koreı túbeginde oqyrmandary bar. Onyń ústine gazet shyǵarylyp, Soltústik Koreıanyń Máskeýdegi elshiligine jiberiledi. Búginde gazet ınternet keńistigine belsendi enip, aqparattyq portalǵa aınalýda. Gazettiń saıty, áleýmettik jelilerdegi resmı paraqshalary qarqyndy damyp, óziniń YouTube arnasy ashyldy.