1-shi qańtarda UQSHU Bas hatshysy qyzmetine kirisken Imanǵalı Tasmambetov osy ýaqytqa deıin birqatar mańyzdy kezdesýler ótkizip úlgerdi.

Atap aıtqanda, Belarýs Prezıdenti Aleksandr Lýkashenkomen, Reseı qorǵanys mınıstri Sergeı Shoıgýmen jáne osy eldiń Indýstrıa jáne saýda mınıstri Denıs Mantýrovpen júzdesip, uıymnyń (ODKB) jumysyn talqylady.

Esterińizge sala keteıin, UQSHU-nyń quramyna Armenıa, Belarýs, Qazaqstan, Qyrǵyzstan, Tájikstan Respýblıkalary men Reseı Federasıasy kiredi. Uıymnyń negizgi jaýapkershiligi – oǵan qatysýshy elderdiń aýmaqtyq qaýipsizdigi.

«Eger kimde-kim Ýkraına men Reseı arasyndaǵy qaqtyǵys bizdiń qaqtyǵys emes, tynysh qana daýyldyń bitýin kútemiz dep oılasa, olar qatelesedi. Ýaqyt kelip, pozısıany naqty aıqyndaıtyn sát týady», – dedi Lýkashenko Tasmaǵambetovpen kezdesýde.

Al Shoıgý UQSHU aıasynda ótetin iri áskerı jattyǵýlar jóninde sóz qozǵasa, Mantýrov qarý-jaraq pen áskerı tehnıkany birlesip ázirleý jáne óndirý jóninde ODKB-ǵa múshe memleketterdiń kásiporyndary arasynda kópjaqty kooperasıa qurý qajettigin aıtty.

Sarapshylardyń aıtýynsha qazirgideı soǵys júrip jatqanda agresor elmen birge áskerı jattyǵý ótkizip, birlesip áskerı tehnıkany óndirý, bizdiń elge abyroı ákelmeıdi. 

Al sizdiń kózqarasyńyz qandaı? ODKB sharttary Qazaq elin soǵysqa qatysýǵa májbúrleýi múmkin be?