Astanada depýtattar jolaýshylardy avtomobılmen tasymaldaý salasyndaǵy keıbir memlekettik fýnksıalardy mindetti múshelikke (qatysýǵa) negizdelgen ózin-ózi retteýge berýge qatysty túzetýler usynyldy. Otyrys Nurtaı Sabılánovtyń tóraǵalyǵymen Ekonomıkalyq reforma jáne óńirlik damý komıtetinde ótti. Zań jobasy týraly QR Kólik mınıstrligi Kólik komıtetiniń tóraǵasy Altaı Álı baıandama jasady.

Ol avtokólik jolaýshylar tasymaly salasyndaǵy tórt memlekettik fýnksıany ózin-ózi retteýge kóshirý jumystary 2020 jyldan bastap júrgizilip jatqanyn aıtty. Oǵan turaqty halyqaralyq, oblysaralyq jáne turaqty emes avtobýs tasymaly, sondaı-aq taksı qyzmetteri kiredi. Baıandamashynyń aıtýynsha, bul ýákiletti organdar aıqyndaıtyn negizgi damý baǵyttaryna nazar aýdara otyryp, joǵary sapaly standarttar men erejelerdi jyldam qabyldaýǵa múmkindik beredi.

– Tasymaldaý prosesin baqylaý memlekettik deńgeıden ózin-ózi retteýdiń ishki uıymdastyrýshylyq deńgeıine ótedi. Ol tasymaldaý naryǵyna qatysýshy retinde óziniń árbir múshesiniń jumysyn baqylaýǵa jol ashady. Tasymaldaýshylardyń biliktiligin únemi arttyryp otyrýǵa múmkindik beredi, – dedi Altaı Álı.

Tutastaı alǵanda, kólik qaýipsizdigi kúsheıtilip, búrokratıa, sybaılas jemqorlyq táýekelderi, memlekettik qyzmetkerlerge túsetin júkteme jáne búdjet shyǵystary azaıady dep kútilýde. Joba aıasynda «Kólik», «Avtokólik», «Astananyń mártebesi», «Ruqsattar men habarlamalar», «QR keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý» týraly zańdarǵa túzetýler engizilmek.  

Baıandama sońynda depýtattar baıandamashyǵa suraqtar qoıyp, usynystaryn aıtty. Májilis depýtaty Tilektes Adambekov saladaǵy ózekti suraqtardy sıfrlyq júıe arqyly sheshýdi, mınıstrliktiń jaýapkershiligin arttyrýdy usyndy.  

– Birinshiden, bul zań jobasy áli shıki. Zańnama arqyly qoldaryńyzdan keletin dúnıeni ǵana qaldyryp, jaýapkershilikti basqa naryqqa berip jibergilerińiz keledi. Ekinshiden, bul túzetýden keıin qandaı nátıje bolady? Mysaly, jol apaty azaıa ma, jemqorlyq joıyla ma, tehnıkalyq jaǵdaı jaqsara ma, osy qyzmetti paıdalanatyn qarapaıym halyq osyny seze me, men muny baıandamadan da, slaıdtan da kórgen joqpyn. Úshinshiden, qalanyń ishinde úlken marshrýttardy alyp júrgen avtobýstardyń tabysy jaqsy júrip tur. Olardyń tabysy mol bolyp, kishi marshrýttaǵylar óz kúnin kóre almaı júrse, ol da bolmaıdy. Osynyń bárin jan-jaqty qaraý qajet. Sebebi bul mańyzdy, ózimiz kúndelikti paıdalanatyn zań jobasy dep oılaımyn, – dedi T.Adambekov.

Bul oraıda komıtet tóraǵasy Nurtaı Sabılánov qalaishilik avtobýstarǵa qatysty másele ózekti ekenin aıtty. Avtoparkterge sýbsıdıa berilgenimen, ony eshkim qadaǵalamaıtynyn atap ótti. Sondyqtan sýbsıdıa berý tártibin retteıtin zańǵa ózgeris engizýdi usyndy.

– Óıtkeni sýbsıdıa avtoparkterdiń shyǵyndaryn ótep jatyr. Al negizinde ol jańa tehnıkalar alýǵa jumsalýy kerek. Joba boıynsha jumys endi bastaldy. Ár máselege baılanysty taldaý júrgizip, talqylaý barysynda jiti qaraımyz. Memlekettik baqylaý avtotasymaldaýshylar palatasyna músheligin rastaýdy ǵana júzege asyryp, sony ǵana baqylaıdy eken. Ol durys emes, barlyq tasymaldaýshy qadaǵalanýy kerek. Sol sebepti avtotasymaldaýshylar palatasyna qoıylatyn talaptardy da kúsheıtý qajet. Olar jalpy zań boıynsha jumys isteýge tıis, – dedi N.Sabılánov.

Jıynǵa májilismendermen qatar múddeli memlekettik organdardyń, kásibı qoǵamdastyq pen qoǵamdyq uıymdardyń ókilderi qatysty. Jıynda aıtylǵan usynystardy Májilis depýtaty Tilektes Adambekov bastaǵan jumys toby qaraıdy.