Qazaqstanda 12 qazanda "Jel toqtaǵan jer" degen fılmniń prokatqa shyǵýy tıis bolǵanyn, biraq ol kartınanyń premerasynan soń bul týyndyny úlken ekranǵa shyǵarý belgisiz sebeppen keıinge shegerilgenin jazǵan bolatynbyz.

Qamshy.kz-ke Qazaqstanda bul kartınanyń prokaty ne sebepti keıinge shegerilgenin "Jel toqtaǵan jer" fılmin túsirgen "ARDFILM" kınokompanıasy túsindirdi:

"Jel toqtaǵan jer" kınokartınasynyń prokaty 2023 jyldyń 12 qazanynda bastalady dep josparlanǵan bolatyn.

Alaıda qazaqstandyq kıno kórermenderi tarapynan rejıser Murat Esjannyń "Oıan, qazaq" fılmine degen qyzyǵýshylyǵynan týyndaǵan úlken rezonanstan keıin jáne kartınany kınoteatrdan kórip úlgermegenderdiń narazylyǵynan soń dıstrıbútorlar "Oıan, qazaq" fılminiń prokat merzimin uzartý týraly sheshim qabyldady.

Tıisinshe, bizdiń "Jel toqtaǵan jer" atty kartınamyz 1920-1930 jyldardaǵy "Asharshylyq" kezeńindegi oqıǵalardy sýretteıtindikten, bir tarıhı zamandy qamtıtyn ekinshi kartınanyń qabattasyp prokatqa qatar shyǵýyn kórermen tartý turǵysynan tıimsiz dep sanadyq.

Kıno prokatshylary men iri dıstrıbútorlarmen josparly jumys júrgizip, elimiz boıynsha qoldan kelgenshe kóbirek kınoteatr qamtyp, kóbirek kórermen tartý maqsatynda "Jel toqtaǵan jer" fılminiń prokatyn bıylǵy qarasha aıyna shegerý týraly sheshtik",

delinedi "ARDFILM" kınokompanıasy bergen túsiniktemede.