"Ulttyq qor – balalarǵa" degen bul baǵdarlama prezıdenttiń joldaýynda tapsyrylǵan soń, memlekettik apparat apyl-ǵupyl ony 2024 jyldyń 1 qańtaryna deıin iske qosyp úlgerýge tyrashtandy.

Eń qyzyǵy – kezinde halyqtyń zeınetaqy qoryndaǵy "shekten asatyn" óz aqshasyn alýyna ruqsat bergendeı, bul da tikeleı qolyńa aqsha kúıinde túspeıtin "aqsha". Zeınetaqy qorynan artyq aqshasyn shyǵaryp alý úshin qazaqstandyqtar nebir qýlyq-sumdyqqa bardy. Óıtkeni bylaı, "má" dep qolyńa bermeıdi. Berý emes bul! "Mıyńdy qosyp, memleketti aldap kór" degen nárse boldy ol.

Qarjy mınıstri Jamaýbaev aıtqandaı, týa sala shotyna Ulttyq qordan aqsha túsetin ár balanyń atynda 18 jasqa deıin 3-4 myń dollardan aspaıtyn aqsha jınalady eken. Memlekettik organdardyń ábden eseptegen somasy osy ǵana. Qazirgi baǵammen ary ketse 1,8 mln teńge!

Árıne, ol da aqsha ǵoı. Biraq ony eshbir bala qolyna almaıdy. Ómirinde qolyna ustap kórmeıtin aqshasy. Ulttyq qordaǵy shotynda ǵana turatyn.

Ol aqshany balalar eki-aq maqsatta jumsaı alady eken: ne oqýǵa, ne baspana alýǵa. Boldy!

Eger bala aqyly oqý oqymaıtyn bolsa, ıpotekaǵa baspana almaıtyn bolsa, ol aqshanyń taǵdyry ne bolatyny belgisiz. Tek bul ómirde qolyńa almaıtynyń ǵana belgili.

"Beremin" dep, shyndyǵynda bermeıtin memleket bolyp tur eken áli mynaý Qazaqstan degen. Biraq joqty bardaı etip kórsetýdiń has sheberi.

Ashyǵynda, memlekettiń ár balaǵa ulttyq qordan aqsha tólenedi degeni – taza aldaý! Qur popýlızm bop tur ǵoı? Eger úkimetke es kirmese, onda búıtip bergeni qursyn.

Esesine bastalmaı jatqan bul istiń ýákiletti operatorlary daıyn tur: "BJZQ" AQ, "Qazposhta" AQ, "Otbasy banki" AQ.

Bul jobany júzege asyrýǵa ekinshi deńgeıli 9 bank nıet bildiripti.