Almatydaǵy Baým toǵaıynda aǵashtar jappaı otalyp jatyr. Bireý sap-saý turǵan aǵashtardy alyp tastap, onyń ornyna qurylys alańyn daıyndap jatqan sıaqty, deıdi belsendi Sanjar Boqaev.

Orman sharýashylyǵy komıteti sanıtarlyq maqsatta Baým saıabaǵynda 1000 aǵashty otaýǵa ruqsat bergen eken. Al jergilikti ekobelsendilerdiń esebinshe, bıyl bul parkte 2074 aǵash tamyrymen julynyp, túbinen kesilgen, onyń jartysyna jýyǵy saý aǵash bolǵan.

Toǵaıdaǵy jaǵdaıdy aıtyp, turǵyndar ekobelsendi Gúlmıra Tashımovany shaqyrǵan.

— Jıhaz úshin kesilgen be degen oı keldi. Kesilgen dińderdiń uzyndyǵy 7-8 m, dińderi túzý. Keptelip qalǵan Kamazdy shyǵarý úshin ádemi aǵashty shynjyrmen zaqymdap tastaǵan. Al kesilgen aǵashtardyń dińinen belgi tappadyq, tek bireýine ǵana qoıylǵan. Seısenbide olar barlyq bóshkelerdi aýdaryp, aǵashty shabý týraly belgilerdi kórsetýge ýáde beredi. Biraq bizdiń tekserimizdiń nátıjesinde esh bir aǵashta eshqandaı belgi joq ekenin anyqtadyq. Medeý» saıabaǵynyń qyzmetkerleri memlekettik organdar men turǵyndardy aldap otyr. Myńnan artyq aǵash kesildi. Eko-patrýl eriktileri aǵash dińin sanap, naqty sanyn shyǵardy,  — deıdi ol. 

Sanjar Boqaevtiń aıtýynsha, Almaty ákimdigi sanıtarlyq kesý men jerde qalǵan aǵash qaldyǵyn shyǵarýǵa 27 mln teńge bólgen. Tenderdi “Solarit” JSHS-i jeńip alǵan. Biraq jumysty uqypsyz atqaratyny jaǵa ustatady. Máselen, aýrý aǵashty kesý úshin ormanǵa aýyr tehnıkamen kirip, jas taldardy taptap, úlken saý aǵashtardy aıamaı zaqymdaı bergen. Tıtteı janashyrlyǵy bolsa, bul jerge tehnıka kirmeýi tıis edi.

Boqaev mynadaı tarıhı faktini keltiredi:

2001 jyly premer-mınıstr Qasym-Jomart Toqaev bop turǵanda arnaıy qaýlymen Almatynyń Baým toǵaıynda Memlekettik tabıǵat eskertkishi jáne erekshe qorǵalatyn tabıǵı aýmaq mártebesi berilgen.

2018 jyly premer-mınıstr Baqytjan Saǵyntaevtyń qaýlysymen saıabaq erekshe qorǵalatyn tabıǵı aýmaq mártebesinen aıyryldy. Óıtkeni onyń aldynda, 2017 jyly sol kezdegi ákim Baýyrjan Baıbek Nursultan Nazarbaevtan “Erekshe qorǵalatyn tabıǵı aýmaqtar týraly” Zańdy ózgertip, bul ormandy respýblıkalyq mańyzy bar mártebeden aıyryp, qala ákimdiginiń komýnaldyq menshigine berýdi suraǵan bolatyn. 

– Kórip otyrǵanymyzdaı, bul Baýyrjan Baıbek pen Nursultan Nazarbaevtyń bolashaqta osy baqtyń ornyn kezekti turǵyn úı keshenin salý úshin bosatyp bermek jospary bolǵanyn bildiredi. Muny basqasha túsindirý múmkin emes. Baým saıabaǵy jyldar boıy qaraýsyz qalyp, ony qasaqana qurtylyp kelgeniniń syry belgili boldy, – deıdi Sanjar Boqaev.