«Aıdyn Aıymbetov táýelsiz Qazaqstannyń úshinshi ǵaryshkeri atandy. Men halqymdy elimiz baǵyndyrǵan jańa jetistikpen quttyqtaımyn. Bizdiń qazirgi zamanǵy tarıhymyzdaǵy osy uly oqıǵaǵa kásibı turǵydan úles qosqandardyń bárine alǵys aıtamyn. Reseılik seriktester men basshylarǵa, sondaı-aq eks­pedısıanyń sheteldik múshe­lerine aıryqsha rızashylyq bildiremin», – dedi Memleket basshysy sóziniń basynda.

Budan keıin Nursultan Nazarbaev ǵaryshty ıgerý ár­daıym adamzattyń eń ańsarly armandarynyń biri bolǵanyn atap óte kele, búginde bul barlyq Jer shary turǵyndarynyń eń bıik mısıasy ekenin jetkizdi. «Bizder, qazaqstandyqtar baıtaq jerimizde búkilálemdik ǵarysh aılaǵy – Baıqońyrda alpys jyl boıy jumys júrgizilip kele jatqanyn maqtan etemiz. Ǵaryshkerlerdi Jer júzi osy jerden, Qazaqstannan shyǵaryp salady. Adamzattyń ǵalam týraly tanym kókjıegin keńeıtetin kúrdeli ekspedısıalardan keıin olardy osy jerde qarsy alamyz. Ǵaryshqa ushqan jarty ǵasyrdan astam ýaqyt ishinde 38 eldiń 545 ǵaryshkeri ǵarysh keńistiginde bolyp qaıtty. Sol elderdiń qatarynda Qazaqstan da bar. Al A.Aıymbetovtiń sátti sapary elimizdiń ǵarysh jylnamasynyń jańa bir paraǵyn ashty», – dedi Qazaqstan Prezıdenti.

Memleket basshysy sonymen qatar, Qazaqstannyń álem boıynsha ǵarysh keńistigin baǵyndyrǵan azamattarynyń sany úsheýden kem emes 9 eldiń biri bolǵanyna nazar aýdardy.

«Bul – Kún júıesiniń keńistigin zertteý jáne ıgerý isine ózge eldermen birge atsalysyp otyrǵan Qazaqstannyń ǵaryshtyq bolashaǵy úshin jasalǵan jańa qadam. Jerdiń tartylys kúshin eńserýge degen umtylys adamnyń eń uly erliginiń biri boldy, solaı bolyp qala beredi. Ol eń batyl ári laıyqtynyń ǵana qolynan keledi. Osyndaı batyrdyń biri – bizdiń úshinshi ǵaryshkerimiz Aıdyn Aıymbetov. Sondyqtan men oǵan «Halyq qaharmany» jáne «Qazaqstannyń ǵaryshker-ushqyshy» ataǵyn, sondaı-aq, Altyn Juldyz ben «Otan» ordenin berý týraly Jarlyqqa qol qoıdym. Mundaı joǵary marapattar onyń Qazaqstan halqynyń ıgiligi úshin jasaǵan erligin aıǵaqtaı túsedi», – dedi Nursultan Nazarbaev.

Qazaqstan Prezıdenti jańa «Halyq qaharmany» A.Aıymbetov endi elimizdiń kórnekti batyr-ǵaryshkerleri qatarynda bolatynyna toqtala kele, ǵarysh salasyna qatysty biraz jáıtterdi eske túsirdi. «Máselen, bizdiń tuńǵysh ǵaryshkerimiz Toqtar Áýbákirovtiń 24 jyl burynǵy ǵaryshqa sapary Qazaqstan Táýelsizdiginiń altyn bastaýy boldy. Osy ushýdy júzege asyrý úshin qanshama qıyndyqty eńserýge týra kelgeni esimizde. Ekinshi ǵaryshkerimiz Talǵat Musabaev – jalpy jıyntyǵy 341 táýlikke sozylǵan 3 ǵarysh ekspe­dısıasyna qatysty. Ol – ashyq ǵarysh keńistigine 8 ret shy­ǵyp, 42 saǵattan astam ýaqyt bolǵan tuńǵysh qazaq. Talǵat Mu­sabaev – Qazaqstan men Reseı­diń ǵarysh salasyndaǵy yntymaq­tastyǵynyń, halyqtarymyzdyń máńgilik dostyǵy men tatý kór­shilestiginiń sımvoly», – dedi Mem­leket basshysy. Osylaı degen Nursultan Nazarbaev A.Aıym­betovtiń Qazaqstannyń ǵarysh­tyq zertteýleriniń besinshi baǵ­darlamasyn júzege asyrǵanyn atap ótti. «Salmaqsyzdyq jaǵ­daıynda «kýlondy krıstal» alý jónindegi zertteýler júrgizildi. Eldiń ekologıalyq problemalary bar óńirlerin, eń aldymen, Aral­dy monıtorıńteý jáne sýretke túsirý jumystary jasaldy. Bir­qatar mańyzdy synaqtar den­saýlyq saqtaý salasyna tikeleı qatysty boldy», – dedi Qazaqstan Prezıdenti bul týrasynda.

Saltanatty rásim barysynda Memleket basshysy Qazaqstan ǵa­ryshkeriniń bul sapary ulttyq ekonomıkanyń ınovasıalyq ǵaryshtyq salasyn damytýdyń jańa kezeńiniń bastaýy bolǵanyna nazar aýdardy. Máselen, Astanada búginde ǵarysh apparattaryn qurastyrý-synaý kesheni salynýda, ol jer serikterin jobalaý, qurastyrý jáne synaý jóninen TMD-da balamasy joq joǵary tehnologıaly kásiporyn bolady. Sonymen qatar, 2014 jyly joǵary dáldiktegi jerseriktik na­vıgasıa júıesiniń jerdegi ınfra­qurylymy qalyptasty, ǵylymı-tehnologıalyq maqsattaǵy ǵarysh júıesin jobalaý jumystary aıaq­talýda. Buǵan qosa, Qazaqstannyń ǵarysh salasyna qajetti kadr­lardy daıarlaý, qaıta daıarlaý jáne biliktiligin kóterý júıesi qu­ryldy, ol stýdentterdi ǵarysh ma­mandyqtary boıynsha Qazaq­stannyń joǵary oqý oryndarynda, sondaı-aq «Bolashaq» baǵ­dar­lamasy arqyly shetelderde oqytý isin qamtıdy. Bul máse­lege qatysty sóılegen sózin­de Nursultan Nazarbaev Qazǵa­rysh­tyń ǵylymı mekemeleri ótken 4 jyl ishinde 37 ǵylymı-zertteý jobasyn júzege asyryp, ónertabys úshin 5 patent alǵanyna toqtaldy.

Sóziniń sońynda Memleket basshysy elimizdiń jańa «Halyq qaharmany» Aıdyn Aıymbetovti eń joǵary memlekettik nagradasymen quttyqtap, onyń ózine júk­telgen mindetti tabysty oryn­daǵanyn aıtty.

Budan keıin sóz alǵan Aı­dyn Aıymbetov óziniń sapary Nursultan Nazarbaevtyń qam­qor­lyǵy men qoldaýynyń arqa­synda júzege asqanyn aıtyp, Elbasyna alǵysyn bildirdi. «Men úshin bul kún – ómirimdegi eń ba­qytty ári tolqýly kún. Óıt­keni, men Prezıdenttiń qoly­nan Otanymnyń eń joǵary nag­radasyn aldym. Men sizdiń tap­syrmańyzben 1998 jyldan beri ǵaryshqa ushýǵa daıyndyq júr­gizdim. Demek, halyqaralyq ekıpaj quramynda Qazaqstannyń aty­nan ókildik etý men úshin bıik mártebe», – dedi Qazaqstan ǵaryshkeri. Osylaı deı kele, ol ózine júktelgen mindetterdiń oryndalǵany týraly baıandap berdi. «Ushý sapary barysynda Qazaqstannyń ǵaryshtyq zertteý baǵdarlamalary iske asyryldy. Qazǵaryshtyń ǵylymı baǵdarlamasy boıynsha Aral jáne Kaspıı teńizderine monıtorıń jasaldy. Sondaı-aq, mıkrogravıtasıa jaǵdaıynda mıkrobólshekterdiń fızıkalyq qasıetteri zertteldi. Munyń bárin aldaǵy ýaqytta bizdiń ǵalymdarymyz termoıadrolyq energetıka, plazmalyq medısına, nanotehnologıa jáne tamaq ónerkásibinde paıdalanatyn bolady. Keıin olar Qazǵarysh pen halyqaralyq ǵaryshtyq yn­ty­maqtastyq aıasynda jalǵasady», – dedi A.Aıymbetov.

Aqordadaǵy saltanatty rásim kezinde Qazaqstan ǵaryshkeri ózi­niń bar kúsh-qýatyn, bilimi men tájirıbesin eldiń ǵarysh sala­syn odan ári damytýǵa jumyl­dyratynyna sendirdi. Budan keıin A.Aıymbetov Nursultan Nazarbaevqa halyqaralyq ǵarysh stansasy bortynda planetamyzdy 150 retten astam aınalyp shyqqan Memlekettik týdy tabys etti.

Derekkóz: "Egemen Qazaqstan" gazeti