Rýza apaı psıhıatrıalyq dıspanserge jatqyzylǵanda, onyń sebebin dolbarlap, keıbir ınternet basylymdar boljam jarıalady. Sonyń birinde buǵan oblys ákimi Asaıyn Baıhanovtyń qatysy bar kórinedi delingen. Qamshy.kz saıtynyń redaksıasy keshe keshkisin óńir basshysyna saýal joldady.

Kóp uzamaı tańerteń Asaıyn Baıhanovtan mynandaı sıpatta jaýap kelip jetti:

«Qaıyrly kún. Buǵan meniń esh qatysym joq. Men Rýza Beısenbaıteginiń Pavlodar oblystyq psıhıkalyq densaýlyq ortalyǵyna jatqyzylýy týraly aqparatty áleýmettik jelilerden bilip-kórdim. Keıinirek polısıa departamentiniń habarlamasyna sáıkes, 102 nómiri boıynsha polısıany jeke keńse ǵımaratyna shaqyrtý faktisi belgili boldy, sodan keıin jedel járdem brıgadasy da sol jerge shaqyrylǵan. Atalǵan shaqyrýlar boıynsha qyzmetterdiń shyǵýy nátıjesinde oqıǵaǵa qatysýshylardyń birin aýrýhanaǵa jatqyzý týraly sheshim qabyldandy. QR densaýlyq saqtaý jáne densaýlyq saqtaý júıesi týraly Kodeksiniń 273-babyna sáıkes ózge derekter jarıa etilmeıdi. Sońǵy málimet boıynsha, búgin dárigerler konsılıým ótkizedi, apaıdyń densaýlyǵy durys bolǵan jaǵdaıda, árıne ol kisi úıine jiberiledi degen úmittemiz».

Al túske qaraı Rýza Beısenbaıteginiń bosap shyqqany belgili boldy. Alaıda ol kisi psıhologıalyq ortalyqtyń esebine alynǵan.

"Oqıǵa ornyna kelgen medısınalyq brıgada psıhıkalyq aýytqýlary belgilerimen R.B. esimdi 66 jastaǵy áıel adamdy Pavlodar oblystyq Psıhıkalyq densaýlyq saqtaý ortalyǵyna jetkizdi. Ortalyq dárigerleri tarapynan naýqasqa eki kún boıy em qabyldaý sharalary jasaldy. Medısına qyzmetkerleriniń qaraýynan keıin densaýlyq jaǵdaıynyń jaqsarýyna oraı, konsılıým sheshimimen naýqas dıspanserlik baqylaý usynysymen úıine qaıtaryldy. Densaýlyq saqtaý salasyndaǵy zańnamaǵa sáıkes, aldaǵy ýaqytta naýqastyń psıhıkalyq aýytqýlary nasharlap, aınalasyndaǵy adamdarǵa zıan keltirý yqtımaldyǵy qaıta baıqalǵan jaǵdaıda, ol emdeýge jiberiletin bolady", – dep habarlady oblystyq DSB.