Búgin QR Bas prokýratýrasynyń jáne İİM-niń Interpol qyzmetkerleri Syrtqy ister mınıstrliginiń kómegimen qylmystyq jaýapkershilikke tartý úshin Ispanıa Koróldiginen qarjy pıramıdasynyń qyzmetine baılanysty transulttyq uıymdasqan topqa qatysqany úshin kúdiktini ekstradısıalady.

Ol 2016-2017 jyldar aralyǵynda zańsyz materıaldyq paıda kórý maqsatynda basqa elderdegi adamdar tobymen «Questra Holding» kompanıasyn qurdy degen kúdikke ilingen.

Qylmyskerler qarjy pıramıdasyn ár túrli elderdiń aýmaǵynda kedergisiz taratý maqsatynda ınternet jelilerde salymshylardy kóbirek tartý úshin kompanıanyń oıdan shyǵarylǵan ınvestısıalyq portfelderin satý týraly aqparat ornalastyrylǵan veb-saıttar ashqan.

Bul top 800-den astam azamatty aldap, 1 mıllıard teńgeden astam shyǵyn keltirgen.

Atalǵan fakti boıynsha sotqa deıingi tergep-tekserý bastalyp, kúdiktiler halyqaralyq izdestirýge jarıalanǵan.

2022 jyldyń jeltoqsanynda Bas prokýratýranyń ekstradısıalyq suraýy boıynsha izdeýdegilerdiń biri Ispanıa aýmaǵynda ustaldy.

Qazir ol Astanadaǵy tergeý ızolátoryna qamaldy.

Atalǵan qylmysty jasaǵany úshin múlkin tárkilep, 10 jyldan 15 jylǵa deıingi merzimge bas bostandyǵynan aıyrý túrindegi jaza qarastyrylǵan.

Ustalǵandy ekstradısıalaý Qazaqstan Respýblıkasy men Ispanıa Koróldigi arasyndaǵy ustap berý týraly 2012 jylǵy 21 qarashadaǵy sharttyń bolýyna baılanysty múmkin boldy.