«Báıterek» holdıńine qatysty otandyq sarapshylar arasynda syn kóp aıtylady. Ony Úkimet pen bıznes arasyndaǵy deldal dep tanıtyndar da bar.

Menedjerleri mıllıondap bonýs alatyn bul qurylymnyń kózin joıý kerektigin aıtýshylar da tabylady.

Alaıda kóptegen synnan keıin bul holdıń qaıta qurylymdaýǵa jatqan bolatyn. 2023 jyly qarasha aıynyń sońynda Dúnıejúzilik bank jarıalaǵan esepte taǵy da syn aıtyldy.

«İri kólemdegi sýbsıdıalardy taratý, qarjy naryǵyna tikeleı áser etý arqyly «Báıterek» holdıńi básekelestikti tejep, jeke ınvestısıalarǵa kedergi bolyp otyr» delingen onda.

Mine, bútin eldiń damýyna jaýapty - Ulttyq ekonomıka mınıstrligi basshylyǵyna búginderi osy holdıń basshysy kelip otyr.

Árıne, bul arada mynandaı zańdy suraq týyndaıdy: bir ulttyq holdıń jumysyn jemisti ete almaǵan adam el ekonomıkasynda qandaı tártip ornatsyn?

Búgin jýrnalıser qaýymy osy suraqty mınıstrdiń ózine tótesinen qoıyp kórdi. Biraq...
Nurlan Baıbazarov esh saspady:

«Men Sizderdiń bul pikirlerińizben kelise almaımyn. Sebebi «Báıterektiń» aktıvi ósip jatyr, taza tabysynyń ózi 409 mlrd teńgeni quraıdy. Ol arada júıeli, onda da transformasıa, tıimdilikti arttyrý boıynsha jumystar atqarylyp jatyr. Eger tabys qurylymyna qaraıtyn bolsaq, basty tabysty biz basty ınvestısıalyq qyzmetten alyp otyrmyz».

Sondaı-aq Ulttyq ekonomıka mınıstri Memleket basshysy ózine jańa Salyq kodeksin, onyń ishinde qosymsha qun salyǵyna qatysty máselerdi qaıta qarastyrýdy tapsyrǵanyn atap ótti.

«Bul baǵytta biz bıznes qaýymdastyqpen, sarapshylarmen jumys istep, atalǵan kodeksti qaıta qarap jazyp shyǵamyz», dedi ol.