«5 jyl boıy fermada eńbek etip, «quldyqta» bolǵan balalarǵa, Ulytaýǵa baryp keldim. Ulytaý oblysy ákimi Berik Ábdiǵalıuly, prokýratýra, İİM-men atalmysh istiń mán-jaıy men qajetti sharalardy zerdeledik. Aqpannyń basynda oblystyq prokýratýra men qamqorshylyqtyń mobıldi toptarynyń tekserisi nátıjesinde bir otbasynan shyqqan úsh bala - bir qyz jáne eki ul anyqtaldy. Patronattyq otbasy olardy balalar úıinen 2018 jyly, balalar 14, 12 jáne 8 jasta bolǵanda alǵan. Balalardyń úlkenderin qaladan 20 shaqyrym qashyqtyqtaǵy óz fermalarynda ustap, mal baǵýǵa májbúrlegen. Fermada eki úıir jylqy jáne 18 sıyr bar» dep jazdy Qazaqstandaǵy bala quqyqtary boıynsha ýákil Dınara Zakıeva jelide.

Fermada bolǵan komısıa músheleri balalardyń ómir súrý jaǵdaılaryn kórip, jaǵalaryn ustaǵan. Al balalardyń ústi-basy adam shoshyrlyq. Deneleriniń ár jeri tyrtyqqa toly, kógergen, ústeri kir-qojalaq, kıimderi jyrtyq. Ábden jadap-júdegen. Kózderinde ushqyn da joq. Osydan-aq úr toqpaqtyń astyna alynǵan balalar ekeni kórinip tur. Al olarǵa memleketten beriletin járdemaqyny qamqorshy óz qajettilikterine jumsap kelgen.

«Balalardyń úlkeni – qyz bala, kolej bitirgen, alaıda is júzinde sabaqqa barmaǵan. Ortanshy ul bala da kolejde «oqıdy». Organdar oqý oryndaryn tekserse, olarǵa únemi balalardyń aýyrǵany týraly anyqtamalar usynylyp otyrǵany anyqtalǵan. Qamqorshy qyz balany jumys istemeseń, ne shaǵymdansań, baýyrlaryńdy kórmeısiń dep qorqytqan. Belgili bolǵandaı, bul qamqorshy jaqynda patronatqa alýǵa bolatyn basqa da balalar bar ma dep surastyrǵan eken», deıdi Zákıeva.

Qazir balalar birge, qaýipsiz jerde. Olarǵa psıhologıalyq kómek kórsetilip jatyr. Oblys ákimi balalarǵa qolaıly jaǵdaı jasaý, kómek kórsetý, balardyń qaıda turatynyn, qaıda oqıtynyn jeke baqylaýyna aldy.

Al búgin asyrandy balalaryn bes jyl boıy qara jumys kúshi retinde paıdalanǵan ógeı ana qamaýǵa alynǵany belgili boldy. 

“Keshe atqarylǵan jumys kezinde Ulytaý oblysynda balalardy qul qylǵan áıel ustalyp, tergeý ızolátoryna qamaldy”, dep jazdy ombýdsmen.