Jýrnalıs Sandýǵash Dúısenovanyń habarlaýynsha, Almaty oblystyq Polısıa departamentinde jumys isteıtin bir top jol saqshylary anonımdi hat joldap, arasha suraǵan eken.

Olar «basshylyqtyń aıdaýymen amalsyz jemqorlyqqa baryp, júrgizýshilerden aqsha alýǵa májbúrmiz» deıdi.
Máselen, bir kóliktegi eki ınspektor basshylaryna aı saıyn 600 myń teńge ótkizýge mindetti eken. «Ol aqshany bermeseń kúnine 12 saǵat jumysqa jegip, túngi aýysymǵa qaldyra beredi», deıdi ınspektorlar.

Hatta aqshany kim jáne ne úshin jınaıtyny taıǵa tańba basqandaı anyq jazylǵan.
«Almaty oblysynyń PPB-niń bastyǵy Muhamedıarov Erlan Berikuly bizge kúnine 10-15 ákimshilik hattama jazyńdar jáne mas júrgizýshilerdi tabyńdar dep tapsyrma beredi. Sondaı-aq 24 ınspektordan quralǵan 12 ekıpajdan 600 myń teńgeden alyp otyrady. Kóp ınspektorlar qyzmettik kóligin úıine qoıady. Ol úshin árqaısysy aıyna qosymsha taǵy 500 myń teńgeden bastyqqa ótkizýi kerek. Budan bólek jeke quramnan aptasyna 30-40 myń teńgeden aqsha jınaıdy. Bul qarjyny departament bastyǵy Baýyrjan Alenov pen birinshi orynbasary Meıram Ábikeevke beremin deıdi. Jańa jylda basshylarǵa syılyq alamyz dep ár ınspektordan taǵy 50 myń teńgeden jınady. Ony ótkizbegender túngi aýysymǵa jáne kezekten tys narádqa túsedi. Qýdalaýǵa ushyrap, túsinikteme toltyrýdan qoldary bosamaıdy», dep baıandapty.
Eger hattaǵy aıtylǵan jaıttar ras bolsa, masqara eken!

«Polısıanyń bedelin túsirmeý úshin İshki ister mınıstrligi dereý qyzmettik tekseris ashyp, hattaǵy hıkaıalardyń anyq-qanyǵyn bilýi kerek», dep eskertedi Sandýǵash Dúısenova.