Pasport bedeli boıynsha Qazaqstan Belarýs pen Botsvana arasynda tur. 
TMD elderi arasynda Belarýssıadan basqa, Moldova, Reseı jáne Ýkraına da Qazaqstandy basyp ozdy. 

Arton Capital qarjylyq konsaltıńtik kompanıasy usynǵan Passport Index tólqujattardyń álemdik reıtıńine sáıkes, álemdegi eń bedeldi tólqujat – BAÁ pasporty, onyń ındeksi 179 bal. Indeks neǵurlym joǵary bolsa, el pasporty soǵurlym bedeldi bolyp sanalady.

Ár eldiń tólqujatyna ındeks qoıarda sarapshylar vızasyz rejımmen kirýge bolatyn elderdiń sany, vızany kelgennen keıin jasaýǵa múmkindik jasalǵan elderi sany sıaqty krıterıılerge mán beredi.

Reıtıńke BUU-ǵa múshe 193 el, sondaı-aq Vatıkan jáne óz tólqujattary bar aýmaqtar (Taıvan, Makao, Gonkong, Kosovo jáne Palestına) barlyǵy 199 eldiń tólqujaty qatysty.

2024 jyly ekinshi orynda ındeksi 177-ni quraǵan bes el — Fransıa, Germanıa, Italıa, Nıderlandy jáne Ispanıa. Úshinshi orynda 176 upaı alǵan bes el – Shvesıa, Fınlándıa, Lúksembýrg, Avstrıa jáne Shveısarıa.

Reıtıńtegi sońǵy oryndardy Sırıa (93-shi), Aýǵanstan (92-shi) jáne Irak (91-shi) alady.

Reıtıńke sáıkes, Qazaqstannyń pozısıasy bir jyl ishinde aıtarlyqtaı jaqsardy. 2023 jyly 56-orynnan 2024 jyly 54-orynǵa kóterildi. Bul rette qozǵalys erkindigi kórsetkishi 91-den 90 balǵa deıin tómendedi. Qazaqstannan basqa 54-oryndy Kosovo jáne Naýrý memleketi ıelendi. 

Aıta keteıik, 2024 jyly álemdegi ortasha qozǵalys erkindigi 111 baldy, al medıanasy 100 baldy qurady.

Kórshi elderdiń arasynda qazaqstandyqtarǵa qaraǵanda Reseı men Qytaı turǵyndarynyń tólqujattary reıtıńte joǵary tur. Reseı Tývalý jáne Chernogorıa sıaqty eldermen birge qozǵalys erkindigi 127 upaımen 37-orynda, al Qytaı 95 balmen 51-orynda. Ózbekstan men Qyrǵyzstan óz kezeginde Gambıa, Ýganda jáne Úndistanmen birge 67 ındeks kórsetkishimen 73-orynda. Túrikmenstan Malımen 77 upaımen 63-orynda tur.

Sonymen qatar QR Týrızm jáne sport mınıstri Ermek Marjyqpaevtyń aıtýynsha, Qazaqstanda álemniń 82 elimen vızasyz rejım jumys isteıdi, al Qytaı men Úndistan sıaqty elderden kelýshiler sany vızasyz rejım engizilgennen keıin aıtarlyqtaı ósti: Qytaıdan kelýshiler 12 ese, al Úndistannan 3 ese artty.