Búginderi Boston Consulting Group kenshilerdiń jumys jaǵdaılaryna júrgizgen sol aýdıt qorytyndysyn shyǵardy, dep habarlaıdy Qamshy.kz kásiporynnyń baspasóz qyzmetine silteme jasap.

Kómir departamentiniń qyzmetine júrgizilgen zertteý-zerdeleý nátıjesinde 2021 jyldan bastap shahtalardaǵy bolǵan qaıǵyly jaǵdaılardyń 95%-na ken ornyndaǵy jarylystar, órt pen gaz taralýy sebep bolǵan.

Kásiporyndy jańǵyrtý boıynsha keshendi jumysty júrgizý usynyldy. Ol júıeni barlyq nysandarda ornatýdan bastaý qajet. Júıelerdi basqarý úshin óndiris derekterin shoǵyrlandyrý tıimdiligin arttyrýǵa jáne geokeńistikter sıaqty syrtqy faktorlarǵa jaýap berýdi jedeldetýge múmkindik beretin ortalyq dıspecherlik qyzmetti qurý usynylady.

Eskertpelerdiń qataryna buǵan deıingi jyldary ózektiligi joq tehnologıalyq jabdyqtardy satyp alýǵa baǵyttalǵan tıimsiz ınvestısıalaý, shahtalarda eńbek jaǵdaılarynyń biryńǵaı standartynyń bolmaýy jáne t.b. kirdi.

"BCG aýdıtiniń qorytyndylaryn nazarǵa ala otyryp, Qarmet aksıoneri Andreı Lavrentevtiń tapsyrmasy boıynsha Kómir departamentinde 2028 jylǵa deıin jańǵyrtýdyń egjeı-tegjeıli keshendi is-qımyl josparyn aıqyndaý boıynsha birlesken jumys toby quryldy", delingen habarlamada.

Aýqymdy naýqannyń negizi maqsaty eńbek ónimdiligi men qaýipsizdigin arttyrý úshin úzdik halyqaralyq tájirıbelerdi engizý bolmaq.

Aıta ketsek, 2023 jyldyń qazan aıynda 46 adamnyń ómirin qıǵan "ArselorMıttal Temirtaý" shahtasynda eń iri apat boldy. Buǵan deıin 2006 jyly Lenın atyndaǵy shahtada iri apat bolyp, ol kezde 41 kenshi topyraq jastanǵan edi. Osydan keıin Úkimet sheteldik ınvestormen aradaǵy kelisimshartty buzýǵa májbúr boldy. Kóp uzamaı aksıonerlik qoǵamǵa jańa ınvestor keldi. Ol kásipker Andreı Lavrentev boldy. Dırektorlar keńesiniń tóraǵasy jáne aksıoneri Lavrentev bolyp tabylatyn Allur kompanıalar toby kásiporynnyń barlyq bólimshesin óz qaramaǵyna aldy. Jańa qojaıyn kompanıanyń burynǵy ataýy – Qarmet-ti qalpyna keltirdi.  

Lavrentev Forbes nusqasy boıynsha Qazaqstandaǵy eń yqpaldy 50 kásipker tiziminde 26-shy orynda tur.