"Iá, qyzmettik tergeý júrgizildi, kóptegen qyzmetker, sonyń ishinde laýazymdy tulǵalar jazalandy", dedi Baýyrjan Syzdyqov.

Biraq ol qaı qyzmetker jazalǵanyn, olarǵa qandaı jaza qoldanylǵanyn naqty aıta almady.

"Endi ol arada ártúrli jaza bar, sondyqtan resmı túrde habarlassańyzdar, biz keıinirek naqtylap beremiz",  dedi vıse-mınıstr.

Syzdyqov Almatydaǵy jer silkinisi týraly aldyn ala qulaqtandyrý júıesine bólingen iri qarajat máselesine qatysty túsinikteme bere almaıtynyn jetkizdi. Óıtkeni atalǵan máselemen búginderi prokýratýra jáne sybaılas jemqorlyqqa qarsy qyzmet aınalysyp jatqan kórinedi.

"Bul arada mynany aıta ketken jón, qulaqtandyrý júıesi, eger aldyn ala habarlandyrý júıesin alatyn bolsaq, onda eki jyl ishinde, aıtalyq, 28 dachık qoıyldy. Jalpy, Almaty búginde 100%-ǵa qamtylǵan, dabyl, qulaqtandyrý qondyrǵylarymen 100% qamtý júrip jatyr. Qazirdiń ózinde bul júıe jumys istep turǵanyna ózderińizder kýásizder", dedi ol.

Ol satyp alynǵan 28 dachık qazir synaq rejıminde jumys istep turǵanyn aıtady.

"Olardyń barlyǵy mamandar belgilegen oryndarǵa ornatylyp, qazir synaqtan ótip jatyr. Al testileý merzimi bir jylǵa sozylady. Iaǵnı, biz olardy bir jyldan keıin ǵana óndiriske shyǵaramyz... 2022-2023 jyldar barysynda eki jylda satyp alyndy, birinshi jyl, meniń oıymsha, 11, ekinshi jyly 17 dachık alyndy", dedi Baýyrjan Syzdyqov.