Bul týraly OKQ alańynda QR MAM Mádenıet komıteti tóraǵasynyń orynbasary Sábıt Barlybaev habarlady.

   - Tarıhı turǵydan alǵanda, jańa jyldy toılaý 8-9 kúnge jalǵasyp, ony "Naýryznama" dep ataǵan. Árıne, bul týraly derekter uly fılosof-jazýshylarymyz Mahmud Qashǵarıdiń, Máshhúr Júsip Kópeıulynyń, Abaı Qunanbaıulynyń, Muhtar Áýezovtiń eńbekterinde jazylǵan, - dedi spıker.

    Naýryznama onkúndigi

14 naýryz kúni – Kórisý kúni - Amal merekesi toılanady. Negizinde elimizdiń batys óńirlerinde saqtalǵan mereke endi barlyq aımaqtarda toılanady.

15 naýryz – Qaıyrymdylyq kúni. Bul kún qaıyrymdylyqqa, meıirim men tatý kórshilikke arnalady.

16 naýryz – Mádenıet jáne ulttyq salt-dástúr kúni. Bul kún mádenıetimizdi, ónerimiz ben ulttyq qundylyqtarymyzdy nasıhattaýǵa arnalady.

17 naýryz – Shańyraq kúni. Osy kúni otbasylyq qundylyqtarymyzdy dáripteýge, ónegeli urpaq tárbıelegen úlgili otbasylarǵa arnalǵan mádenı is-sharalar uıymdastyrylady.

18 naýryz – Ulttyq kıim kúni. Naýryznamanyń onkúndiginde elimizdiń barlyq óńirlerinde ulttyq kıimderimizdi nasıhattaýǵa baǵyttalǵan túrli is-sharalar ótkizilmek.

19 naýryz – Jańarý kúni. Osy kúni kóktemgi aǵash egý dástúrin jalǵastyrý usynyldy.

20 naýryz – Ulttyq sport kúni. Bul kúni eldiń barlyq aımaqtarynda ulttyq sporttan túrli jarystar uıymdastyrylady.

21 naýryz – Yntymaq kúni. Bul kúnniń ıdeıasy – jalpy halyq bir-birine degen syı-qurmetterin arttyryp, tatýlyq pen birlikti nasıhattaý.

22 naýryz – Jyl basy. Bul kúni elimizdiń barlyq óńirlerinde jalpyhalyqtyq mádenı-sporttyq is-sharalar ótkizilip, stıldi etnoaýyldar men túrli jármeńkeler uıymdastyrylady.

- 14-23 naýryz aralyǵynda "Naýryz-bazarlyq" maýsymy jarıalanady. Bul kúnderi saýda oryndarynda jappaı satylymdar ótkizý, jeńildikter jasaý josparlanýda, - dedi QR MAM Mádenıet komıteti tóraǵasynyń orynbasary Sábıt Barlybaev OKQ alańynda.

Aıta ketsek, Naýryznamanyń qorytyndy kúni, jańa jyldy qarsy alýdyń sımvoly retinde 23 naýryz – Tazarý kúni dep jarıalandy. Bul kúni Qazaqstannyń barlyq aımaqtarynda jalpyulttyq ekologıalyq aksıa ótedi.