Eki kúnnen keıin Sochı qalasynda qysqy olımpıada oıyndary bastalady. Sport oqıǵasyna bara almaǵan jankúıerler saltanatty ashylý rásimi men tartysqa toly tamasha sátterdi telearnadan qyzyqtaıdy. Alaıda oıyndardy kórsetý quqyǵy barlyq arnalarǵa buıyra bermeıdi. 

Búgin QR Prezıdenti janyndaǵy ortalyq komýnıkasıalar brıfıńinde Sochıdegi olımpıada oıyndaryn aqparattyq qoldaý máselesi sóz boldy. Birer kúnnen keıin sport álemindegi eń basty oqıǵa HHİİ qysqy olımpıada oıyndary bastalady. 7-23 aqpan aralyǵynda dúnıejúziniń mıllıondaǵan jankúıerimen birge qazaqstandyq kórermen de Sochıdegi qyzý tartysty tamashalaıdy. Al el aýmaǵynda olımpıada oıyndarynyń translásıalaý quqyǵyna alǵash ret respýblıkalyq eki telearna ıe bolyp otyr. Atap aıtqanda, «Habar» Agenttigi» men «Qazsport» arnasy. Basqa aqparat kózderiniń olımpıadadan qandaı da bir beınematerıal nemese fotosýret taratýy zańsyz dep sanalady. Qysqy olımpıada oıyndaryn Qazaqstanda translásıalaýda aıryqsha quqyqqa ıe bolǵan «Habar» Agenttigi» ashylý saltanatyn tikeleı efırde kórsetedi. 3,5 saǵatqa sozylatyn oqıǵa 7 aqpanda Astana ýaqytymen 22:00-de kóreremen nazaryna usynylady. Sonymen qatar telearna sporttyń jeke túrleriniń aıaqtalýyn jáne olımpıadanyń jabylýyn da tikeleı efırden beredi. Bıylǵy efır ýaqytynyń júzden astam saǵaty osy jyldyń basty sporttyq jarysyna arnalmaq. Jankúıerler olımpıadanyń eń qyzyqty jáne mańyzdy sátteri týraly jarys kúndeligi arqyly habardar bolady. Sondaı aq olımpıadalyq saıystar týraly sújettik sholýlar «24KZ» telearnasynyń jańalyqtarynan da udaıy berilip turady. Al oıyndardy efırde zańsyz taratqan derekterge kýá bolǵan azamattarǵa quqyq qorǵaý orgyndaryna dereý habarlasý suralady.

Sochıden alǵashqy tarnslásıa erten saǵat 11:35-te «Qazsport» telearnasynan bastaý alady. Kórermender snoýbordtan irikteý syndaryn tamashalaıdy. Endeshe, sport oqıǵalaryn tamashalap, jerlesterimizdiń jeńisterine kýá bolaıyq.

"Baq.kz"