Bir aıdan beri sý tasqyny eldiń batys, shyǵys, soltistik óńirin ábigerge salyp jatyr. Birneshe óńirde tótenshe jaǵdaı jarıalandy. Zań boıynsha, memlekettik mekemelerde tótenshe jaǵdaıdyń aldyn-alý jáne saldaryn joıý úshin tenderdi ashyq konkýrssyz ótkizýine ruqsat bar. «Qamshy» tilshisi «Memmekemeler osy ruqsatty qalaı paıdalynyp jatyr?», «Tótenshe jaǵdaı kezinde kimnen ne satyp alyp jatyr?» degen suraqqa jaýap izdep kórdi.
Tótenshe jaǵdaıǵa baılanysty ótkiziletin tender prosesi ashyq emes. Memlekettik satyp alý portalynda merdigerdi qalaı tańdaǵany, oǵan qandaı negiz bolǵany, satyp alýdy qalaı ótkizgeni jaıly aqparat kórsetilmeıdi. Iaǵnı, tapsyrys berýshi portalǵa tender jóninde esep ornalastyrýǵa mindetti emes.
TÁJİRIBESİZ KOMPANIAǴA BERİLGEN 150 MLN
23 naýryzda Almaty oblysy Talǵar aýdany Besaǵash aýylynda laı kóshkini júrip, birneshe jeke úı búlindi. Almaty oblysynyń tótenshe jaǵdaı departamenti kóshken laı kólemi 500 sharshy metr ekenin, bir úı turýǵa jaramaı qalǵanyn, taǵy birneshe úı búlingenin habarlaǵan.
Memlekettik satyp alý portalynyń málimetinshe, laı kóshkininen búlingen úılerdi jóndeýge 150 mln teńge bólingen. Aqparatqa qaraǵanda, ákimdik bul qarjyny Baıanaýyl kóshesinde ornalasqan 8 úıdi qalpyna keltirýge jumsamaqshy.
Besaǵash aýylynyń ákimdigi tenderdi «KazGıdroSpesStroı» dep atalatyn kompanıaǵa berdi. Atalǵan seriktestik byltyr tamyzda ǵana qurylǵan tájirıbesiz kompanıa. Buǵan deıin memlekettik tapsyrys oryndamaǵan. Ádette tenderdi bir kózden ótkizýge týra kelgende tapsyrys berýshiler tájirıbesi mol kompanıalarmen kelisimshart jasaıdy. Al Besaǵash ákimdiginiń ne sebepti byltyr ǵana qurylǵan, qurylǵaly beri óndirip jumys istemegen kompanıany tańdaǵany túsiniksiz.
Kompanıa quryltaıshysy – Asqat Nurmanov, dırektory – Raıymbek Nurmanov. Ashyq derekózdegi aqparatqa qaraǵanda aǵaıyndy ekeýdiń ákesi – Baqyt Nurmanov buryn Tótenshe jaǵdaılar mınıstrligine qarasty mekemelerde basshylyq qyzmet atqarǵan, Talǵar aýdandyq qurylys bólimin basqarǵan.
MUZ JARYP MILLIONDAR TABATYN KOMPANIA
Shyǵys Qazaqstan oblysy Altaı aýdanynyń ákimdigi ózenderdegi muzdy jarýmen álek. Ákimdik 5 aqpanda Turǵysyn, Maleevsk, Zýbovsk, Bykovo, Bogatyrevo aýyldaryndaǵy muz qatqan ózenderde jarylys jumystaryn júrgizýge dep 150 mln teńge bólgen. Arada bir aı ótken soń muz jarýǵa taǵy 50 mln teńge jumsady.
Altaı aýdanynyń ákimdigi eki rette de KAZ EXPLO SERVICE kompanıasyna tender bergen.
Bul kompanıa Shemonaıha aýdanyndaǵy Ýba ózeniniń muzyn jarýǵa da tender alǵan. Aýdan ákimdigi KAZ EXPLO SERVICE-ke 15 aqpanda 53 mln teńgeni, 29 naýryzda 36 mln teńgeni tikeleı bir kózden bergen.
Memlekettik satyp alý portalynyń málimetinshe, 2019 jyly qurylǵan KAZ EXPLO SERVICE kompanıasy muz jarýmen, qar shyǵarýmen aınalysady. Seriktestik osy ýaqytqa deıin Shyǵys Qazaqstan oblysyna qarasty aýdan ákimdikterinen 38 tender alǵan. Onyń 28-i tikeleı bir kózden buıyrǵan.
Basa aıta ketetin jaıt, Shyǵys Qazaqstandaǵy ózenderde sý tasý qaýpi jylda bolady. Sáıkesinshe, sý tasqynyn aldyn alý jylda atqarylatyn jospardaǵy jumys. Soǵan qaramastan ákimdikter tenderdi aldyn ala ashyq konkýrs jarıalap ótkizbeıdi, jylda sý tasıtyn shaqta, aqpan, naýryz aılaryna qaraı «ózderine yńǵaıly» kompanıamen tikeleı bir kózden kelisimshart jasaı salady.
QURYLǴANYNA 86 KÚN BOLMAǴAN KOMPANIA 86 MLN ALDY
Jylda qarǵyn sýmen álek bolyp jatatyn Semeı ákimdigi de tótenshe jaǵdaıdy «tıimdi» paıdalanyp jatyr.
Qalalyq ákimdiktiń turǵyn úı-kommýnaldyq sharýashylyq bólimi 2 sáýir kúni «EKOSEMEI A» dep atalatyn kompanıamen «tikeleı bir kózden» kelisimshart jasasty. Tender quny – 86,6 mln teńge.
Kelisimshartqa qaraǵanda, merdigerge bul qarjy aǵyn sýlardy burǵany úshin tólengeli otyr. Ákimdik portalda aǵyn sýlardy burý jumystaryn tabıǵı monopolıaǵa jatqyzyp, tenderdi bir kózden berýdi osylaısha negizdegen.
Ashyq derekkózderdegi málimetke qaraǵanda 86 mln teńgege ońaı ıe bola salǵan «EKOSEMEI A» JSHS bıyl 14 aqpanda tirkelgen. Iaǵnı, qurylǵanyna bir jarym aı ǵana bolǵan tájirıbesiz kompanıa. Semeı ákimdigi qysyltaıań shaqta ne sebepti tájirıbesiz kompanıaǵa tender bergeni túsiniksiz.
Pikir qaldyrý