Memleket basshysy sý tasqynynan zardap shekken halyqqa naqty kómek kórsetýde bıznesmenderdiń róli zor ekenine aıryqsha nazar aýdardy.

Prezıdent Forbes tizimine kiretin qazaqstandyq iri kásipkerler ár oblysqa bekitilip, kómek kórsetetinin aıtty.

“Bizdiń elimizde Forbes tizimine kiretin iri kásipkerler bar. Olarmen arnaıy kezdesemiz. Olar ár oblysqa, aýdanǵa, eldi mekenge bekitiledi jáne naqty jaýapkershilik júkteledi. Bul bir jaǵynan kásipkerlerdiń múddesine saı keledi. Óıtkeni olar ózderiniń qosqan úlesiniń naqty nátıjesin kóredi. Halqyna qaıyrymdylyq jasaǵan azamat retinde sizderdiń de esimderińiz memleket tarapynan eleýsiz qalmaıdy dep oılaımyn”, – dedi Qasym-Jomart Toqaev.

Sonymen qatar prezıdent eriktilerge zor qurmetpen qaraıtynyn jáne jan-jaqty qoldaý kórsetetinin atap ótip, olarǵa rızashylyq bildirdi. 

Eske salsaq, buǵan deıin Toqaev Qostanaı oblysyna baryp, sý tasqynynan zardap shekken turǵyndarmen kezdeskeni týraly jazǵan edik.