«Januıa» otbasy ınstıtýtyn qoldaý ortalyǵy súıemeldeýinde júrgen kóp balaly, az qamtylǵan otbasylarǵa arnalǵan «Otbasy – jan qazynasy» atty sporttyq is-sharasy uıymdastyryldy, dep habarlaıdy elorda ákimdiginiń resmı saıty.

«Qazirgi sátte «Januıa» otbasy ınstıtýtyn qoldaý ortalyǵynda 418 otbasy súıemeldeýde júr. Olarǵa quqyqtyq, psıhologıalyq jáne áleýmettik kómek kórsetiledi. Búgingi «Otbasy kúnine» arnalǵan is-sharamyz da qoldaýdyń bir túri retinde sanalady», - dedi «Januıa» otbasy ınstıtýtyn qoldaý ortalyǵynyń basshysy Bahtıar Aıtpaev.

Osynaý kúnge oraı, Ortalyq saıabaqta jaqyn arada ǵana ashylǵan Bıatlon sportynan 5 aýdannan jınalǵan 21 otbasynyń arasynda báseke ótti.

«Búgin kóp balaly, az qamtylǵan otbasylary arasynda birinshi márte sporttyq jarysty qolǵa alyp jatyrmyz. Buǵan deıingi jyldary mádenı, konserttik is-sharalardy ótkizip kelip edik. Qazirgi sátte otbasylarǵa tek materıaldyq qoldaý kórsetý jetkiliksiz dep oılaımyn. Sondyqtan januıalarǵa qyzyqty bolýy úshin, sporttyq is-sharany tańdadyq. Nege? Birinshiden, salaýatty ómir saltyn nasıhattaý. Keı otbasylar bıatlon degen sportty birinshi ret estýi de múmkin. Búgingi is-shara arqyly jańa sport túrimen tanystyryp, turǵyndardyń oı-órisin keńeıtemiz. Bálkim, búgingi is-shara arqyly bala óziniń boıyndaǵy talantyn ashýy múmkin. Ári sport seksıalarynyń qoljetimdi ekenin kórsetemiz. Ekinshiden, sporttyq básekede ata-anamen bala jaqsy til tabysyp, ózara túsinistigi artady. Úshinshiden, demalys kúni otbasylarymyz qalamyzdaǵy kórkem jerlerimizdiń biri Ortalyq saıabaqta keremet emosıa alady», - dedi jarys uıymdastyrýshysy Zýlfıa Sadvakasova.

Aıta ketsek, «Januıa» otbasy ınstıtýtyn qoldaý ortalyǵy 2019 jyldyń tamyzynda ashylǵan bolatyn.

«Búgingi bıatlon jarysynan alǵan áserim keremet. Tabıǵat aıasynda ata-analarmen birge balany sportqa baýlý jaqsy ádistiń biri dep sanaımyn. Buǵan deıin bıatlonmen aınalysyp kórmegenmin. Biraq jarys barysynda kózimniń qyraǵylyǵynyń arqasynda 10 nysanaǵa da dál tıgizdim. Bul – balalarymyzǵa ónege. Ózim oqýshy kezimde áýesqoı retinde júgirýmen shuǵyldandym. Balamdy da bastaýyshta karate seksıasyna bergenmin. Osyndaı is-sharany uıymdastyrǵany úshin bárine alǵysymdy bildiremin», - dedi Almaty aýdanynyń turǵyny Ásel Omarova emosıasymen bólisip.

Saıys erejesi boıynsha, bir otbasydan 2 adam óner kórsetip, ár qatysýshy 800 metr júgirip, 10 márte nysanany kózdep atty.

Jarys «Januıa» otbasy ınstıtýtyn qoldaý ortalyǵy jáne Qazaqstan bıatlon Federasıasy, Astana qalasynyń bıatlon Federasıasy, Astana qalasynyń Dene shynyqtyrý jáne sport basqarmasy, №2 Balalar - jasóspirimder sport mektebimen birlesip, júzege asyryldy.

Shara sońynda barlyq otbasylardyń arasynda jeńimpazdar arnaıy kýbok, estelik syılyqtarmen marapattaldy.