Belgili ónertanýshy, ánshi, ulttyq ónerdi dáripteýshi, zerttteýshi Erlan Tóleýtaı «Qazaqfılmge» qatysty tyń derek jarıalady.

Bul týraly ol Facebook jelisindegi paraqshasynda jazdy.

«Myna sumdyqty jarıalamasqa amalymyz joq!

Búgin biz ıaǵnı rejıser Elzat Eskendir ekeýmiz «Ábildiń» Eýropa tórinde sátti hám tabysty ótken trıýmfýaldy premerasynan keıingi jeńisin «Qazaqfılm» ujymymen jáne onyń ýaqytsha basshylarymen bólispekke kınostýdıaǵa bardyq. Alaıda bizdi «Qazaqfılmge» kirgizbedi. Esik kózindegi qaraýyl bógegen soń biz IO Aıdar Omarovtyń jeke ohran bastyǵyna telefon shalyp sóılestik. Ol bolsa meni ishke kirgize almaıtynyn. Óıtkeni IO Omarovtan meni kirgizbeý jóninde buıryq túskenin jetkizdi.

Shyntýaıtynda, biz «Qazaqfılmge» erigip barmaǵan edik. Eýropadan soń «Qazaqfılm» basshylyǵynan habar kútkeli aptanyń júzi bolǵan-dy. Alaıda A.Omarov bizdeı halyqaralyq kınofestıval jeńimpazdaryn quttyqtamaq túgili habarlasýdy boıyna ar sanady bilem – habarlaspady. Bolmaǵan soń ózimiz bardyq. Sebebi «Ábil» memlekettik tapsyryspen túsiriilgen «Qazaqfılmniń» tól týyndysy bolǵandyqtan osy fılmniń keı máselelerin basshylyqpen aqyldasqymyz kelgen edi. Sondaı-aq bir aıǵa sozylatyn Eýropa saparyna qarjylaı qoldaý kórsetý jóninde kómek suraǵan rejıser Elzat Eskendirdiń qańtar aıynyń 14- i kúnderi IO A.Omarovqa jazǵan hatynyń taǵdyryn da bilgimiz kelgen. Óıtkeni arada 1 aı, 10 kún ótse de A.Omarovtan esh jaýap bolmaǵan edi. Ekeýmiz osynyń da jaıyn bilmek boldyq. Sondaı-aq «Qazaqanımasıa» SHB jaıyn óz kózimen kórmekshi edim. Óıtkeni «Qazaqanımasıa» jóninde nebir sýyq habarlar jeldeı esip, tarap jatqan edi. Myna vıdeoda aıtylǵandaı búgin sonyń anyǵyn bildim: men Eýropa memleketterinde óner shashyp, mádenı maıdan keship júrgenimde ıaǵnı meniń kınostýdıada joq kezimdi ózderiniń pasyq áreketterin júzege asyrýǵa jymysqylyqpen paıdalanǵan A.Omaroa bastaǵan «Qazaqfılmniń» ýaqytsha bastyqtary men ondaǵan jyldan beri jetekshi redaktor bolyp tabylatyn «Qazaqanımasıa» SHB Astanaǵa kóshirip jiberýge astyrtyn sheshim qabyldaǵan. Astyrtyn sheshim qabyldaǵany sol emes pe – «Qazaqanımasıa» basshylyǵymen jáne ujymyna aıtpaǵan. Aıtpaq túgili sezdirmegen. Maqsat aıqyn: olar Sháken Aımanov atyndaǵy «Qazaqfılmdi» osylaı aıaýsyz ári alaıaqtyqpen bólshekteý arqyly kınostýdıanyń túbine jetip tynbaq. Óıtkeni «Qazaqfılmniń» jerin satpaqshy bolyp júrgen qylmystyq topqa osy «Qazaqanımasıa» ujymy birneshe jyldan beri qatty qarsylyq kórsetýmen keledi. Endi on oılanyp, myń tolǵanǵan bul lobbı toptar alynbas qamalǵa aınalǵan Anımasıa bekinisin alýdyń amalyn tapqandaı – ata jaýlary «Qazaqanımasıa» shyǵarmashylyq birlestigin Almatydan jer aýdarý arqyly joıyp jibermek.

Men bul afórany – HHI ǵasyrdaǵy qazaq kıno ónerine jasalǵan eń aýyr qastandyq hám eń el mádenıetindegi adam aıtqysyz sıpatqa ıe alaıaqtyq dep baǵalaımyn. Munyń artynda qazaq sábılerin rýhanı asharshylyqqa ushyratý saıasaty jatyr. Bular aqparat quraldary arqyly qazaqty qaıta orystandyrýǵa Kremlden tapsyrma aldy jáne sony júzege asyrýǵa belsene ári astyrtyn kiristi dep edi, ras bolǵany ma, aǵaıyn, áıtpese, mynaý ne sumdyq!

Biz kınogerler, bul sumdyqqa kónbeımiz ári aıyptaımyz jáne jan aıamaı kúresemiz! Qazaqtyń tuńǵysh múltıplıkasıa rejıseri, uly anımator Ámen Qaıdarov osydan 57 jyl buryn qurǵan anımasıalyq kıno óneriniń qara shańyraǵyn qulatpaımyz! Sol úshin de «Qazaqanımasıa» shyǵarmashylyq birlestigin jer aýdartpaımyz jáne anımatorlardy qorlap jazalaýdyń aqymaqtyq hám soraqy, qorlyq sharasy – mundaı katorgyǵa aıdalyp masqara bolmas úshin ólispeı berispeımiz! Qoldańyzdar bizdi, osynaý mádenı maıdanda! Eger qazaq rýhy mádenı maıdanda jeńilis tapsa, saıası-ekonomıkalyq, áleýmettik eń bastysy Memleketti saqtaý muraty jolyndaǵy maıdandardyń barlyǵynda jeńilmek jáne bul Táýelsizdiktiń aqyry bolmaq. Beti aýlaq, árıne!», - dep jazdy Erlan Tóleýtaı.