2024 jyldyń aqpan aıynda Almaty oblysynda úıge basyp kirip, balalarǵa shabýyl jasaǵan er adam sottaldy.

Ótken jyldyń 16 aqpanynda Almaty oblysynyń Jambyl aýdanynda belgisiz bireý úıge basyp kirip, tórt balaǵa shabýyl jasaǵan edi. Aıtýlarynsha, er adam olardy uryp-soǵyp, baılap, tamaqtaryna pyshaq taqaǵan. 

Balalardyń aıǵaıyn kórshileri estip, júgirip kelgen. Kúdiktini polıseıler izin sýytpaı ustap, balalar aýrýhanaǵa jetkizildi.

Ol kezde Almaty oblysynyń prokýratýrasy sottalýshyǵa Qylmystyq kodekstiń 126-baby 2-bóliginiń 5 jáne 7-tarmaqtary ( Eki nemese odan da kóp adamdy bas bostandyǵynan zańsyz aıyrý), 149-baptyń 2-bóligi (Turǵynjaıǵa qolsuǵylmaýshylyqty buzý), 120-bap 1-bóligi (Zorlaý) jáne 120-baptyń 4-bóligi (Zorlaý, ıaǵnı jábirlenýshige nemese basqa adamdarǵa kúsh qoldanyp nemese ony qoldaný qaterin tóndirip ne jábirlenýshiniń dármensiz kúıin paıdalanyp jynystyq qatynas jasaý) boıynsha is qozǵady. 

Almaty oblysy Jambyl aýdanynyń prokýratýrasynyń málimetinshe, sotqa deıingi tergeý barysynda kámeletke tolmaǵan qyzǵa qatysty "Zorlaý" baby rastaldy.

"Kámeletke tolmaǵan balany zorlaý faktisi anyqtaldy. Qorytyndysy boıynsha qylmystyq is máni boıynsha qaraý úshin Almaty oblysynyń qylmystyq ister jónindegi mamandandyrylǵan aýdanaralyq sotyna joldandy. Sot úkimimen sottalýshy I.B.N. 21 jylǵa bas bostandyǵynan aıyrý jazasyna kesildi (sot aktisi zańdy kúshine endi)", – delingen habarlamada.

Vedomstvonyń habarlaýynsha, Qylmystyq-prosestik kodekstiń 29-babyna (Jarıalylyq) sáıkes kámeletke tolmaǵandardyń qylmystyq quqyq buzýshylyqtary, jynystyq qol suǵylmaýshylyqqa qarsy qylmystar týraly, proseske qatysýshylardyń ómiriniń ıntımdik aspektileri týraly aqparatty qorǵaý nemese jábirlenýshilerdiń, kýálardyń jáne olardyń týystarynyń qaýipsizdigin qamtamasyz etý maqsatynda sotta ister jabyq tártipte júrgiziledi.

"Sottalýshyǵa qatysty sot otyrysy jabyq esik jaǵdaıynda ótti. Bul qylmystyń egjeı-tegjeıleri jarıa etilmeıdi", – delingen habarlamada.