Almatynyń qaq ortasynda ornalasqan “Ibragım Núsipbaev” atyndaǵy mektep-ınternatynyń jerin belgisiz bir dókeıler ıemdenip ketken.

Bul týraly belgili dintanýshy Qaırat Joldybaıuly óziniń feısbýk paraqshasynda jazy. 

"Bos turǵan jerdiń bárin taýysyp, endigi kezek Almaty qalasynyń qaq ortasyndaǵy “Ibragım Núsipbaev” atyndaǵy tarıhy tereń eń alǵashqy qazaq mektep ınternatynyń jerine keldi me?

Smaǵul Elýbaı sekildi kórnekti jazýshylar men talaı ult zıalylary túlep ushqan bul ǵylym ordasy qalada ornalasqanymen Almaty oblysyna qaraıdy. Osydan úsh jyl buryn mektep jataqhanasynda kúrdeli jóndeý jumysy bastalǵan. Merdigerdiń bólingen qarjyny jymqyrýy, oblys jaýaptylarynyń qadaǵalaýynyń nasharlyǵynyń saldarynan 4 aıda bitýi tıis jóndeý jumysy 3 jyldan beri aıaqsyz qalǵan. Sonyń saldarynan balalar jataqhana retinde mekteptiń bir bóliginde turyp, qalǵanynda oqyp kelgen. Endi Almaty oblys ákimshiligi jataqhananyń bitpeı turǵan  jóndeý jumysyn aıaqtaýdyń ornyna mektepti tolyqtaı jaýyp, Qonaev qalasyna kóshirýge sheshim shyǵarypty. Qonaevta salynatyn ǵımaratqa ınvestor da “taýyp” qoıypty.

Al endi osy tusta oryndy suraq. Qonaevqa jańa ǵımarat salyp, mektepti kóshirgennen keıin Almaty qalasynyń qaq ortasynda, kórikti jerde ornalasqan tarıhı mekteptiń taǵdyry ne bolmaq? Aýqymdy jer ýchaskesin kim ıelenbek? Qandaı maqsatta qoldanbaq? Bizdiń oıymyzsha mektep jerine kóz tigip otyrǵan belgili qurylys kompanıasy bar. Solar oblys ákimdigi “tapqan” Qonaev qalasynda jańa ǵımarat salyp bermekshi “jomart ınvestorlar”.  Áıtpese, jańa ǵımarat salǵannan góri  mektep jatahanasynda bastalǵan jóndeý jumysyn aıaqtaý oblys ákimdigine álde qaıda ońaı ári tıimdi emes pe?

Bul kúdigimiz orynsyz emes.
Osydan biraz jyl buryn eski bıliktiń ýaqytynda Almaty qalasy Dostyq kóshesiniń boıynda ornalasqan talaı qazaq zıalylary bilim alǵan «2 qazaq mektep-ınternaty apattyq jaǵdaıda tur” dep, qoldan ótirik syltaý uıymdastyryp, birneshe gektor jerin aqshaǵa qunyqqan olıgarhtar belden basyp tartyp alǵan bolatyn.  Ornyna “Dostyk Residence” turǵyn úı keshenin salyp tastady.

Biz aıtyp otyrǵan Almatydaǵy eń alǵashqy myna tarıhı mektepti japtyryp, jerin tartyp alý áreketiniń de senarıi osyǵan uqsaıdy. Aıaqsyz qalǵan kúrdeli jóndeý jumysynyń saldarynan jataqhananyń shańy shyǵyp, qazylyp jatqan jerlerin ádeıi kórsetip, “apattyq jaǵdaıda tur” degen syńaıda jaldamaly kanaldar men blogerler arqyly arnaıy  aqparattyq manıpýlásıa jasaýdy bastap ta ketti.

Shyntýaıtynda,  mektep ǵımaratynyń  súıegi óte berik. Jer silkinisi kezinde shydamdylyǵyn neshe ret dáleldep tastaǵan. Qabyrǵalarynda bir de bir shytynaý da joq.

Biz  mundaı bassyzdyqqa áste jol bermeımiz. Elimizde mektep jetpeı, balalarymyz úsh aýysymda oqyp jatyr. Al mynalar qalanyń kórikti jerindegi tarıhı  mektepti jaýyp, jer ýchaskesin qoldy etpekshi. Tarıhı mekteptiń joıýylýyna, balalar bolashaǵyn saýdaǵa salynýyna túbegeıli qarsymyz.

Kerisinshe qalanyń kórikti jerinde oryn tepken tarıhı mektepke respýblıkalyq arnaıy statýs berip, daryndy balalarǵa arnalǵan ulttyq mektepke aınaldyrýymyz qajet.

Bul boıynsha osy mekteptiń túlekteri, ata-ana, ustazdary bolyp Prezıdentke, Bilim mınıstrligine, Bas prokýratýraǵa arnaıy aryz-shaǵymymyzdy daıyndap jatyrmyz. Qajet bolsa, ulttyq quryltaı deńgeıinde de kóteremiz, – dep jazady Qaırat Joldybaıuly.