Qazaqstanda Qazaq tiliniń ulttyq sózdik qoryn qurý josparlanyp otyr. Tıisti jobany Ǵylym jáne joǵary bilim mınıstrligi ázirledi.

Qujatqa sáıkes, ulttyq sózdik qory akademıalyq jáne aýdarma sózdikter, Qazaq tiliniń ulttyq korpýsy, termınologıalyq baza jáne ártúrli formattaǵy derekter jıyntyǵyn qamtıtyn data-setter negizinde qalyptastyrylady.

"Jobanyń mańyzdy aspektisi – Qazaq tiliniń ulttyq sózdik qory ashyq qoljetimdi memlekettik aqparattyq júıe bolatyny. Bul ony bilim berý jáne ǵylymı maqsattarda, sondaı-aq qazaq tilin óńdeý tehnologıalaryn damytý úshin barynsha tıimdi paıdalanýǵa múmkindik beredi", – delingen qujatta.

Qazirgi erejelerde mynadaı negizgi uǵymdar paıdalanylady:

• Generasıa – derekter men aldyn ala belgilengen erejeler negizinde jańa kontentti (mátin, sýret, dybys) avtomatty túrde jasaý prosesi;
• Jasandy ıntellekt (JI) modelderi – qazaq tilindegi derekterdi óńdeý tehnologıalary men algorıtmderin túrli júıelerge, qosymshalarǵa nemese platformalarǵa engizý prosesi.

• Ulttyq sózdik qoryn qalyptastyrýdyń maqsattary:

  • Qazaq tilin mádenı qundylyq retinde saqtaý, qorǵaý jáne damytý;
  • Memlekettik til mártebesin nyǵaıtý;
  • Qazaq tiliniń barlyq qoldaný salalaryn qamtıtyn resýrstardy jınaqtaý;
  • Qoldanystaǵy leksıkalyq quramdy júıeleý, sıfrlandyrý jáne generasıalaý;
  • Qazaq tilin jasandy ıntellektke jáne zamanaýı tehnologıalarǵa beıimdeý;
  • Tildik derekterdi óńdeý úderisterin avtomattandyrý.

  Joba "Ashyq NQA" portalynda 2025 jyldyń 19 naýryzyna deıin qoǵamdyq talqylaý úshin ornalastyrylǵan.