28 naýryzynda túnde Jambyl oblysynyń birqatar aýdandary men Taraz qalasynda jer silkindi. Oblys ákimdigi resmı málimdeme taratty.

Jer dúmpýiniń joǵary qarqyny – 5 bal – Merki aýdanyndaǵy Merki aýylynda tirkeldi. T. Rysqulov aýdanynyń Qulan aýylynda jer silkinisiniń kúshi 4 baldy, Taraz, Shý qalalarynda, Qordaı, Moıynqum aýdandarynda – 2 baldy qurady.

Oblys ákiminiń tapsyrmasyna sáıkes oblystyq jedel shtab jumys istep jatyr. 

Barlyq tirshilikti qamtamasyz etý júıeleri qalypty jumys istep jatyr. Zardap shekkender týraly málimet joq. Aldyn ala málimet boıynsha T.Rysqulov aýdany Qaraqystaq aýylyndaǵy mádenıet úıi, Merki aýdandyq aýrýhanasy, Oıtal aýylyndaǵy mektep ǵımaratynyń qabyrǵasynda jaryqtyń paıda bolǵany anyqtaldy. Basqa nysandar týraly aqparat naqtylanyp jatyr, - delingen resmı aqparatta.

Aımaq basshysy Erbol Qarashókeev jaǵdaımen tanysý úshin T.Rysqulov jáne Merki aýdandaryna bardy.

8(7262)513575 nómiri boıynsha "jedel jeli" iske qosyldy. Tolyq aqparat qosymsha habarlanady.

Eske salsaq, ótken túnde saǵat 03:46-da Jambyl oblysynyń keı jerlerinde jer silkindi.