Bıylǵy aqpanda áleýmettik jelide Semeıde oryn alǵan oqıǵanyń beınejazbasy tarady. Úsh-tórt jasóspirim bir balaǵa qorqaýsha jabylyp, tepkilep, qorlap jatqan kórinis qoǵamda úlken rezonans týdyrdy. Budan keıin 11 jastaǵy Álınurdyń ómiri ózgerdi me, memleket tarapynan oǵan qandaı kómek kórsetildi?
Jábir kórgen bala men onyń otbasyna memlekettik organdar áli kúnge járdem kórsetip jatqany belgili boldy. CMN jazǵandaı, mamandar balanyń densaýlyǵy men psıhoemosıonaldyq jaǵdaıyn baqylaýda ustap otyr. Sotta ata-anasynyń múddesin qorǵaıtyn advokat taǵaıyndaldy. Osy oqıǵaǵa beı-jaı qaraı almaǵandar qarajat jınap, balanyń otbasy páter satyp aldy. Sondaı-aq jábir kórgen bala men onyń ápkesin ózderi tańdaǵan mektepke aýystyrdy.
Abaı oblysynyń bala quqyqtary jónindegi óńirlik ýákili Elzıra Soltanbaeva: «Memleket, mektep jáne medısınalyq mekemeler tarapynan qoldaý kórsetildi. Otbasynyń advokaty bar. Ol barlyǵyn baqylaýda ustap otyr. Psıhologtar da jumysyn jalǵastyrady. Bul bir kúnniń jumysy emes», — deıdi.
İshki ister mınıstrligine qarasty «Dınamo» deneshynyqtyrý-sport qoǵamy Álınurdy óz qamqorlyǵyna aldy. Oblystyq bilim basqarmasy basshysynyń mindetin atqarýshy Ásem Núskenova: «Osy oqıǵadan keıin biz birden polısıaǵa habarlastyq. Balalardyń ókilderi, psıholog, bala quqyqtary jónindegi ýákil, bárimiz túnniń ortasyna deıin polısıa bóliminde boldyq. Bir jyl buryn oblysta psıhologıalyq járdem beretin ortalyq ashylǵan bolatyn. Ortalyq psıhologtary balalarmen jumys isteı bastady», — dedi.
Al Álınurǵa jábir kórsetkenderge qandaı jaza qoldanyldy?
Eń aldymen oblystyq bilim basqarmasynyń qyzmetkerleri kámeletke tolmaǵandar isteri jónindegi qalalyq, sodan keıin oblystyq komısıada árqaısysynyń áreketin saralady. Sodan keıin alty jasóspirimniń isin sotqa jiberdi.
Abaı oblystyq sotynyń sheshimimen 13 jáne 16 jastaǵy qyzdar devıantty minez-qulqy balalarǵa arnalǵan mamandandyrylǵan mektepke tórt aıǵa jiberildi. Olardyń birneshe ret zań buzǵany anyqtaldy: qoǵamdyq oryndarda ishimdik ishken, túnde qaıda júrgeni belgisiz, úıinde qonbaǵan. Al 13 jasar bala aıryqsha ustaý rejımindegi mektepke ornalastyryldy. Ol eki aıdyń ishinde eki qylmystyq is jasaǵan, biraq ol kezde qylmystyq jaýapkershilikke tartylatyn jasqa jetpegen. Bala qańtar aıynan beri ıývenaldyq polısıa tirkeýinde turǵan.
Aıta ketk kerek, mektep basshylyǵy osy balalardyń qujatyn kámeletke tolmaǵandar isteri jónindegi komısıa qaraýyna birneshe ret jibergen kórinedi. Alaıda jasyna baılanysty esepke qoıý múmkin bolmaǵan.
Kúni keshe Abaı oblysynyń kámeletke tolmaǵandar isteri jónindegi mamandandyrylǵan aýdanaralyq soty mektep oqýshysyn soqqyǵa jyqqan jetkinshekterdiń ata-analaryna qatysty úkim shyǵardy.
Sot sheshimimen olar ata-analyq mindetterin tıisinshe oryndamaýynyń ákimshilik jazaǵa ákelip soǵýy baby boıynsha kináli dep tanyldy.
Ata-analardyń biri bes táýlikke ákimshilik qamaýǵa alyndy. Tórteýine 78 640 teńge mólsherinde aıyppul salyndy.
Sottyń baspasóz qyzmeti habarlaǵandaı, ata-analar balalarynyń minez-qulqyn, júris-turysyn durys qadaǵalamaǵan. Sot sheshim shyǵararda barlyq mán-jaıdy eskerdi.
