2025 jyldyń alǵashqy úsh aıynda Almatyda samokattarǵa qatysty bolǵan 13 jol-kólik oqıǵasy tirkeldi. Barlyq jaǵdaıda jaraqat alǵandar bar, 13 adam zardap shekken.

Al 2024 jyly qalada samokattardyń qatysýymen 156 jol-kólik oqıǵasy tirkelip, 162 adam jaraqat alǵan.

"Jol apattarynyń aldyn alý maqsatynda polısıa tarapynan birqatar aýqymdy sharalar ótkizildi. Atap aıtqanda, osy kezeńde jol qozǵalysy erejelerin buzǵany úshin 1 401 samokat júrgizýshisi ákimshilik jaýapkershilikke tartyldy. Bul byltyrǵy sáıkes kezeńimen salystyrǵanda eki ese kóp", – dep habarlady quqyq qorǵaý organdary.

Alaıda polısıa qyzmetkerleriniń aıtýynsha, "ár samokat júrgizýshisiniń janyna ınspektor qoıý múmkin emes". Sondyqtan qazirgi ýaqytta basty nazar aldyn alýǵa, eskertý men túsindirý jumystaryna aýdarylyp otyr. Polısıa barlyq jol qozǵalysyna qatysýshylardy tártipke jáne jeke jaýapkershilikke shaqyrady.

"Samokat júrgizýshileri – jol qozǵalysynyń tolyqqandy qatysýshylary ekenin túsinýi tıis jáne belgilengen erejelerdi saqtaýǵa mindetti.

Eresekterdiń jalǵa alynǵan samokattardy kámeletke tolmaǵan balalarǵa berýi – erekshe alańdaýshylyq týǵyzyp otyr. Bul – jol berýge bolmaıtyn jaǵdaı! Balalarda kólik quralyn basqarý tájirıbesi men daǵdysy jetkiliksiz, olar qaýip-qater deńgeıin tolyq túsine bermeıdi. Mundaı jaǵdaılar qaıǵyly aıaqtalǵan oqıǵalarǵa da alyp kelgen", – dep tolyqtyrdy Almaty PD.