Qazaqstan Ulttyq banki alaıaqtar messendjerlerde jalǵan nemese paıdalanýshylardyń buzylǵan derbes akkaýnttaryn paıdalanatyn sqemalar týraly eskertedi.
Qaskóıler messendjerlerde Qazaqstan Ulttyq banki nemese ózge memlekettik jáne quqyq qorǵaý organdary qyzmetkerleriniń jalǵan akkaýntyn paıdalanady. Al profıl shynaıy kórinýi úshin jalpyǵa qoljetimdi derekkózderde, onyń ishinde vedomstvolardyń resmı resýrstarynda ornalastyrylǵan sýretter men emblemalardy qoldanady.
Sonymen qatar, alaıaqtar ózderin messendjerdiń tehnıkalyq qoldaý qyzmetinen dep tanystyryp, azamattarǵa akkaýntyn joıýǵa ótinish berý týraly habarlama jiberedi. Bul sheshimniń kúshin joıý úshin azamattarǵa saıtqa ótýdi usynady. Onda óz telefon nómirin kórsetip, habarlamada kórsetilgen bir rettik kodty engizýdi talap qylady. Osylaısha, olar akkaýntqa ıelik etip, paıdalanýshyny buǵattaıdy, - delingen aqparatta.
Sodan soń qaskóıler jalǵan nemese buzylǵan akkaýnttardy paıdalana otyryp, burynǵy ıesiniń týystary men tanystaryna hat jazady jáne túrli syltaýmen aqsha aýdarýdy, siltemege ótýdi, qosymshany júkteýdi, messendjerde jańa fýnksıalardy iske qosýdy nemese jeke derekterin habarlaýdy suraıdy.
Budan bólek, alaıaqtar jalaqysy joǵary perspektıvaly jumys týraly habarlamalar taratady nemese qoǵamdyq oryndarda QR-kodtar jarıalaıdy. Paıdalanýshy kórsetilgen siltemege ótken kezde olar sol mezette messendjerge, mobıldi qurylǵyǵa nemese derbes derekterge qol jetkizedi.
Ulttyq bank azamattardy qyraǵy bolýǵa jáne jasyryn aqparatty úshinshi tulǵalarǵa habarlamaýǵa, messendjerdegi kúdikti habarlar men telefon qońyraýlaryna senbeýge, suratýlardyń túpnusqalyǵyn qaıta tekserýge jáne aqsha aýdarymdaryn jasamaýǵa, kúmándi siltemeler men faıldardy ashpaýǵa, sondaı-aq HopToDesk, RustDesk, RUDesktop, AnyDesk, TeamViewer jáne t.b. qashyqtan qol jetkizýge arnalǵan qosymshalardy ornatpaýǵa shaqyrady, - dep jazdy banktiń resmı saıty.
Qazaqstan Ulttyq banki úshinshi tulǵalar tarapynan alaıaqtyq áreketterdi boldyrmaý úshin memlekettik organdardyń nemese Ulttyq banktiń qyzmetkeri retinde qońyraý shalǵan adammen aradaǵy áńgimeni dereý doǵaryp, qajet bolǵan jaǵdaıda memlekettik organnyń resmı nómirine alaıaqtyq áreket týraly óz betinshe habarlaýdy usynady.
