Almaty polısıasy qaraqshylyq shabýyl jasady degen kúdikpen bir top adamdy ustady.
Belgili bolǵandaı, qaskóıler jábirlenýshini páterge shaqyrý úshin tanysý saıtyn paıdalanyp, oǵan kúsh qoldanyp, iri kólemdegi aqshasyn tartyp alǵan.
Bul derek boıynsha qylmystyq is qozǵaldy.
Jedel-izdestirý is-sharalary barysynda krımınaldyq polısıa qyzmetkerleri aýdandyq polısıa qyzmetkerlerimen birlesip, úsh kúdiktini ustady. Olardyń barlyǵy óz kinálaryn moıyndap, urlanǵan zattardyń bir bóligi tárkilendi.
«Qylmyskerler bolashaq qurbandarmen baılanys ornatý úshin onlaın platformalardy birinshi ret paıdalanyp otyrǵan joq. Biz eskertemiz: adamdarmen jelide tanysqan kezde óte saq bolyńyz. Tanys emes jerlerde kezdesýge kelispeńiz, ásirese páterge shaqyrǵan bolsa. Kishkene kúmánińiz bolsa, polısıaǵa habarlasyńyz. Vırtýaldy keńistikke senim artý naǵyz qaýipke aınalýy múmkin ekenin eskertemiz», - dedi, Almaty qalalyq PD Krımınaldyq polısıa Basqarmasynyń bastyǵy Talant Isaev.