Májiliste ótken Úkimet saǵatynda Ádilet mınıstri Erlan Sársembaev alıment tólemderine qatysty ózekti máselelerge toqtaldy.
Mınıstrdiń aıtýynsha, alımentter – kámeletke tolmaǵan balalardyń quqyqtaryn qamtamasyz etetin áleýmettik mańyzy joǵary tólemderdiń biri.
Jyl basynda oryndalýǵa jatatyn 283 myńnan astam atqarýshylyq qujat tirkelse, onyń ishinde 12 835 is (shamamen 4%) alıment tóleýden jaltarǵan boryshkerlerge qatysty bolyp otyr, - dedi Sársembaev.
Mınıstr bul qujattar boıynsha májbúrlep oryndatý sharalary qoldanylatynyn jetkizdi.
Onyń aıtýynsha, alıment óndirý kezinde negizgi kedergi – boryshkerlerdiń turaqty tabysy men múlkiniń bolmaýy. Keıbir jaǵdaılarda azamattar tabystaryn ádeıi jasyrý arqyly tólemderden jaltaryp keledi.
Mınıstrlik jumyssyz boryshkerlerdi jumysqa ornalastyrý boıynsha júıeli jumys júrgizip keledi. Nátıjesinde sońǵy jyldary bul kórsetkish aıtarlyqtaı artqan. Eger 2020 jyly 1 559 adam jumyspen qamtylsa, 2024 jyly bul san 6 232-ge jetken. 2024 jyly alıment tólemegeni úshin 4 642 boryshker ákimshilik jaýapkershilikke tartylǵan. Sonymen qatar, QR Qylmystyq kodeksiniń 139-baby boıynsha 745 qylmystyq is tirkelip, 461 is sotqa joldanǵan. Nátıjesinde 391 boryshker sottalǵan, - dep aıtty Erlan Sársembaev.
Mınıstrdiń aıtýynsha, balalaryn asyraýǵa nıettiń bolmaýy, alıment tóleýden jaltarý - otbasylyq-neke qatynastary daǵdarysynyńsaldary. 2023 jyly elde 61 080 ajyrasý tirkelgen, bul neke qıý sanynyń (124 774) shamamen jartysyna jýyq. Erlan Sársembaev otbasy ınstıtýtyn nyǵaıtý men balalardyń quqyqtaryn qorǵaý baǵytynda keshendi sharalar qajet ekenin aıtty.
Ádilet mınıstrligi alıment tólemderin óndirý máselesin erekshe baqylaýda ustaıtynyn jáne bul baǵyttaǵy jumystar jalǵasa beretinin atap ótti.
