Qazaqstannyń Densaýlyq saqtaý mınıstrligi mektep oqýshylarynyń tamaqtanýyn uıymdastyrýǵa memlekettik baqylaýdy kúsheıtetinin málimdedi.

Bul sheshim Mańǵystaý oblysy mektepteriniń asqanalarynda balalardyń jappaı ýlaný jaǵdaılarynan keıin qabyldandy.

Mınıstrliktiń málimdeýinshe, qazirgi qoldanystaǵy zańnama normalary balalardyń barlyq júrgen jerlerin memlekettik baqylaý tolyq qamtýǵa múmkindik bermeıdi.

"Sanıtarıalyq-epıdemıologıalyq talaptardyń buzylýyna baılanysty máselelerdi júıeli túrde sheshý úshin Densaýlyq saqtaý mınıstrligi bilim berý obektilerine memlekettik baqylaýdyń jańa tásilderin ázirledi. Bul tásilder balalardyń barǵan oryndaryna erekshe mártebe berý, tekserýler týraly aldyn ala habarlamany alyp tastaý arqyly obektıvti baǵalaý júrgizý jáne sanıtarıalyq-epıdemıologıalyq talaptarǵa sáıkestigin qamtamasyz etý maqsatynda monıtorıńtik saparlardy engizýdi kózdeıdi", – dep habarlady vedomstvonyń baspasóz qyzmeti.

Mańǵystaý oblysy mektep asqanalaryndaǵy balalardyń jappaı ýlanýynan keıin 72 bilim berý mekemesiniń tizimi jasaldy, ol jerlerde asqanalardyń jospardan tys tekserýleri júrgiziletin bolady. Búgingi tańda 14 mektep asqanasy tekserýden ótti.

Ýlaný oqıǵalaryn tergeý úshin aǵartý jáne densaýlyq saqtaý mınıstrlikteriniń, sondaı-aq Bas prokýratýranyń ókilderinen quralǵan vedomstvoaralyq jumys toby quryldy.

Ótken jyldyń qyrkúıeginde Mańǵystaý oblysy Besshoqy aýylyndaǵy №8 mektepte 460 oqýshy jappaı ýlanǵan bolatyn, balalardyń kópshiligi aýrýhanaǵa tústi. Oqýshylardyń ata-analary jýrnalıserge balalardyń asqanadan jıi sapasyz tamaq ishetinine shaǵymdanǵan.