Astana qalasyndaǵy Orynbor kóshesinde ornalasqan Envy atty velosıped satatyn dúkende memlekettik tilde qyzmet suraǵan ana men qyzyna satýshynyń dórekilik tanytýy áleýmettik jelide keń rezonans týdyrdy.
Oqıǵany jýrnalıs Kámshat Tasbolat Facebook paraqshasynda jarıalaǵan. Ol 6 jasar qyzymen velosıped izdep kelgen. Bala oryssha sandardy túsinbegen soń, jýrnalıs satýshydan velosıped baǵasyn qazaq tilinde aıtýyn suraǵan. Alaıda satýshynyń reaksıasy shekten shyqqan.
"Qazir taıaq jeısiń! Prezıdent ne degenin estimediń be? Sendeılerdi jazaǵa tartady!" – dep aıqaılaǵan satýshy.
Jýrnalıstiń aıtýynsha, satýshy kishkentaı qyzdy "ultshyl" dep te kemsitken.
Satýshynyń ashyq agresıasynan keıin anasy narazylyq bildirmek bolǵanymen, qyzmetker eshteńe bolmaǵandaı, basqa tutynýshylarǵa burylyp ketken.
"Qyzym qatty qorqyp, oıynshyqtardyń arasyna tyǵyldy. Osyndaı jaǵdaılardan keıin balalar psıhologıasynda jara qalady. Buryn "bújáımen" qorqytýshy edi, endi prezıdentpen qorqytatyn bolǵan ba?" – dep jazady Kámshat Tasbolat.
Jýrnalıs dúkende kórneki aqparattyń tek orys jáne aǵylshyn tilderinde ekenin de baıqaǵan. Bul – zańbuzýshylyq.
Qazaqstan Respýblıkasynyń "Til týraly" zańynyń 21-babyna jáne "Jarnama týraly" zańynyń 6-babyna sáıkes, barlyq kórneki aqparat memlekettik tilde jazylýǵa tıis.
Al Ákimshilik kodekstiń 453-baby mundaı buzýshylyq úshin kásipkerge 50 AEK (184 600 teńge) kóleminde aıyppul salýdy qarastyrady.
"Bul dúkende bir aýyz qazaqsha sóz joq. Zańdy saqtamaı otyrǵandar jaýap berýi tıis", – deıdi jýrnalıs.
Qoǵamdyq reaksıa: boıkot pen qysym
Kámshat Tasbolat osy jaǵdaıdan keıin Envy býtıgine boıkot jarıalady. Ol qazaqsha qyzmet kórsetetin basqa dúkendi tapqanyn habarlady. Sonymen qatar Tilderdi damytý basqarmasyn bul máseleni nazarǵa alýǵa shaqyrdy.
Alaıda kóp uzamaı jýrnalıs óz jazbasyn óshirip tastaǵan.
"Óshirtti" dep qysqa ǵana jazyp qaldyrǵanymen, naqty kim nemese qandaı sebeppen ekenin naqtylamaǵan.
Prezıdent Toqaev buǵan deıin azamattardyń bir-birin belgili bir tilde sóıleýge májbúrleýge bolmaıtynyn aıtqan. Alaıda keıbir jaǵdaılarda bul málimdeme memlekettik tilde qyzmet suraǵan azamattarǵa qatysty teris kózqaras týdyrýǵa syltaý bolyp otyrǵany baıqalady. Sonyń saldarynan qazaq tilinde sóılegen adamdarǵa "ultshyl" degen aıyp taǵý nemese tildik quqyqty mensinbeý faktileri qaıta jıileı túskeni qoǵamda alańdaýshylyq týǵyzýda.
