Qazaqstan İshki ister mınıstri Erjan Sádenov Nurǵanat Ǵaıypbaevtyń ólimi men Qarjaýbaı Nurymovtyń Talǵardaǵy úıin órteý oqıǵasyna qatysty qylmystyq isterdiń tergelip jatqanyn málimdedi. Bul týraly ol 18 maýsymda jýrnalıserdiń suraǵyna jaýap bergen kezde aıtty. Mınıstrdiń aıtýynsha, atalǵan ister arnaıy prokýrordyń óndirisinde. "Tergeý amaldary júrip jatyr. Qazir qandaı da bir naqty túsinikteme bere almaımyn. Biraq bárin baqylaýda ustap otyrmyz", – dedi ol.
Nurǵanat Ǵaıypbaevtyń ólimine qatysty tergeý de áli aıaqtalǵan joq. Buǵan deıin polısıa marqum óz-ózine qol jumsaǵan degen nusqany usynǵan. Alaıda onyń týystary bul tujyrymmen úzildi-kesildi kelispeıtinin málimdegen.
2023 jyldyń kúzinde Talǵar qalasynda 16 jastaǵy Sherzat Polat bir top adamnyń qolynan qaza tapqan. Araǵa kóp ýaqyt salmaı, marqumnyń otbasyna tıesili úı órtke oranyp, Sherzattyń jaqyn aǵasy Nurǵanat Ǵaıypbaev kúmándi jaǵdaıda kóz jumǵan edi.
Sherzat Polattyń ólimine baılanysty qylmystyq is boıynsha sot prosesi aıaqtalyp, aıyptalýshylar 1,5 jyldan 23 jylǵa deıin bas bostandyǵynan aıyryldy. Alaıda otbasyna qatysty oryn alǵan ózge eki oqıǵa – úıdiń órtenýi men Ǵaıypbaevtyń ólimine baılanysty tergeý nátıjeleri áli kúnge deıin jarıalanǵan joq.
