Ýkraındaǵy soǵysqa qatysqan atyraýlyq turǵyn 5 jylǵa sottaldy. Bul týraly Atyraý oblystyq soty habarlady. Oǵan QR Qylmystyq kodeksiniń 172-baby («Shet memleket aýmaǵyndaǵy qarýly qaqtyǵystarǵa qatysý») boıynsha aıyp taǵyldy. Úkim áli zańdy kúshine enbegen.
Oblystyq sottyń habarlaýynsha, sottalýshy S. byltyr naýryz sońynda Máskeýge baryp, Reseıdiń ýákiletti organdarymen kelisimshart jasasqan.
"Qysqa merzimdi oqýdan jáne kıim-keshek alǵannan keıin, tank polkiniń quramynda áskerı dáriger retinde Donesk oblysynda qarýly qaqtyǵystarǵa zańsyz qatysqan. 2024 jyldyń jeltoqsanynda qarýly qaqtyǵys barysynda jarylǵysh qurylǵy jarylyp, synyq jaraqatyn alyp, áskerı gospıtálge jatqyzylǵan" dep habarlady sot.
Proses kezinde ol taǵylǵan aıyptardy tolyq moıyndap, ókinetinin aıtyp, túrmeden basqa jaza taǵaıyndaýdy suraǵan. Al prokýror oǵan 6 jyl túrme suraǵan. Sot úkim shyǵarar kezde onyń asyraýynda jas balalar baryn da eskergen.
