Besinshi qyrkúıek kúni Qazaqstanda tilder merekesi toılanady. Bul aıtýly data - ulttyń rýhanı kósemi Ahmet Baıtursynulynyń týǵan kúnine oraılastyrylǵan.
1928-1929 jyldary uly Ahań tarıhy tereńde jatqan Abaı ýnıversıtetinde dáris berip, shákirt tárbıelegen. Ony Qazaq ulttyq pedagogıkalyq ýnıversıtetiniń ujymy árqashan maqtan tutady. Araǵa júz jylǵa jýyq ýaqyt salyp, ult ustazynyń týǵan kúni qarsańynda birtýar perzentimiz dáris oqyǵan kabınet qaıta jańǵyrtylyp, qasıetti qara shańyraqta «Ahmet Baıtursynuly atyndaǵy dárisqanaǵa» aınaldy.
Dárisqananyń ashylýymen qatar ult ustazynyń eńbekterin dáripteý maqsatynda keshe ǵana ýnıversıtet qabyrǵasynda «Ahmet Baıtursynuly oqýlyqtarynyń bıblıografıasy men tekstologıasy» atty ǵylymı-tájirıbelik konferensıa ótti. Onda Ahmet Baıtursynulynyń «Oqý quraly» men «Til jumsar» basylymdarynyń grafıkalyq proeksıalary zamanaýı ádispen qaıta usynylyp, jańa formattaǵy eki kitaptyń tusaýy kesildi.
Ahmet Baıtursynuly - qazaq jazýynyń reformatory, alǵashqy álipbıdiń avtory, qazaq tilin ǵylymǵa aınaldyrǵan tulǵa. Ol til úıretý salasynda «Oqý quraly», «Til - qural» eńbekterimen ǵana shektelmeı, qoldanbaly gramatıkany da jasap shyqqan. 1928 jyly jaryq kórgen «Til jumsar» atty eki bólimdi eńbegi - qazaq til bilimindegi irgeli zertteýlerdiń biri. Ol sonymen qatar «Qazaq» gazetiniń uıymdastyrýshysy retinde de qazaq baspasóziniń negizin qalaýshylardyń biri sanalady.
Abaı atyndaǵy QazUPÝ-dyń oqytýshy-professorlar quramy úshin qazaq til biliminiń negizin qalaýshy, ádebıettanýshy, aǵartýshy retinde ulttyq ǵylymnyń damýyna ólsheýsiz úles qosqan Ahmet Baıtursynulynyń orny erekshe. Onyń eńbekteri til ǵylymy ǵana emes, búkil qazaq rýhanıaty úshin baǵa jetpes qazyna bolyp qala beredi.
Abaı ýnıversıteti Ahańnan qalǵan uly jol - qazaq tiliniń mártebesin arttyrý baǵytynda da irgeli jumystardy júzege asyryp otyr. Qazirde ýnıversıtettiń Basqarma Tóraǵasy-Rektor Bolat Tilep Halyqaralyq «Qazaq tili» qoǵamy Almaty qalalyq fılıalynyń tóraǵasy, ýnıversıtet apparat jetekshisi Janatbek İshpekbaev tóraǵa orynbasary qyzmetterin atqaryp keledi.
Ult ustazynyń týǵan kúni - tek mereke emes, ulttyq rýhtyń jańǵyrýy, urpaqqa izgi muranyń jetkizilý kúni. Qazirgi tańda ýnıversıtetimizde Ahmet Baıtursynulynyń eńbekterin zerttep júrgen jas ǵalymdar men olarǵa jol kórsetip júrgen tájirıbeli zertteýshi ustazdardyń kóp ekeni qýantady.
