Aqpan aıynyń 20,21, 22  kúni  Ǵ.Músirepov atyndaǵy Qazaq memlekettik akademıalyq balalar men jasóspirimder teatrynda muzbalaq aqyn  Muqaǵalı Maqataevqa  arnalǵan  jańa qoıylym «Men, Umytylmaımyn!» lırıkalyq dramasynyń tusaýkeseri bolady.

   Spektákldiń qoıýshy rejıseri Qazaqstannyń eńbek sińirgen artısi, «Qurmet» ordeniniń ıegeri Baltabaı Seıitmamytulynyń pikirin bilgen edik: "Jalpy, Muqaǵalıdy oqymaıtyn qazaq joq, áli kúnge deıin QazUÝ ýnıversıtetinde Muqaǵalıdyń fanattary bar, sol týraly óleń jazyp,  óleń jattap júrgen jastar kóp. Meniń aıtaıyn degenim bul spektáklde – ómiriniń sońǵy sátteri sýretteledi. Onyń qasynda júrgen Mýzasy, Ákesi, Qarakıimdi, dostary beınelenedi. Óziniń ómiriniń sońǵy ýaqyttarynda esep berip berip otyrǵan sıaqty: «Men ne istedim?» degen suraqqa jaýap izdeıdi. Eshkimdi kinálamaıdy, bárin ózinen kóredi.  Jaqsy men jamandy, adal men aramdy shatastyryp júrgen ózim, átteń kesh dep ókinetini bar. Bul jerde basty keıipkerler Muqaǵalı, dáriger, medbıke. Muqaǵalıdyń aıtyp ketken sózi esime túsip otyr: «Meni qazir túsinetin kim bar, bilmeımin ony, men HHİ ǵasyrdyń qurdastarymyn, al HHİİ ǵasyrda men olarǵa týys bolyp kelemin» ,- degen.

Keshegi dúnıeden ótken Farıza Ońǵarsynova apamyzda Muqaǵalıdyń muńyn tyńdap, Muqaǵalıdy jyrlap ketken aqyn apamyz. Bizdiń maqsat - Muqaǵalıdy qaıta tiriltý, qaıta jandyrý, halqymen qaýyshtyrý, sóıletý, úndestirý.

Al, Muqaǵalı rólinde oınaıtyn akter Beıbit Kamaranov bylaı deıdi: 

Muqaǵalı Maqataevtyń ómirin 1,5 jarym saǵatqa syıdyrý múmkin emes. Baltabaı Seıitmamytuly aǵamyzdyń alyp otyrǵan taqyryby – Muqaǵalıdyń sońǵy kúnderiniń bir kúnin kórsetý. Ol bir saǵattyq bolýy múmkin, 5 mınýttyq bolýy múmkin nemese jaı oılanyp ketýi múmkin taqyrypta alynǵan nárse, mine soǵan men barynsha at salysý ústindemin. Biraq bári emes, sol arqyly aqynnyń ótken ómirin sahnalyq qoıylym arqyly berip kórsek degen oı. Munda tek qana ózi týraly, óziniń oılary halyqqa, dostaryna. Eki keıipker ǵana bar: qara kıimdi men mýzasy. Al, men úshin Muqaǵalıdy oınaý óte qıynǵa túspek. Búgingi kezde daıyndyq ústindemiz, tusaýkeser kezinde halyq baǵasyn bere jatar deımin. Ýaqytynda kóre jatarsyz degen oıdamyn.

Gúlnaz Ádilǵalıqyzy