Bıyl 26 qazannan bastap Qazaqstanda qandas mártebesin alý jáne uzartý tártibiniń jańartylǵan erejeleri kúshine enedi. Endi ótinishti elektrondyq formatta – Biryńǵaı kóshi-qon qyzmetteri portaly, mobıldik qosymsha, Qazaqstannyń sheteldegi mekemeleri, halyqqa qyzmet kórsetý ortalyqtary nemese «Elektrondyq úkimet» portaly arqyly berýge bolady.

Ótinishke ómirbaıan, sondaı-aq ótinish berýshiniń jáne onyń otbasy músheleriniń jeke basyn kýálandyratyn qujattarynyń qazaq nemese orys tilindegi notarıaldy kýálandyrylǵan aýdarmasy qosa tirkeledi. Sonymen qatar qazaq ultyna tıesililikti týý týraly kýálik, pasport nemese ózge de resmı qujattar arqyly rastaý qajet. Barlyq qujattar túpnusqa jáne kóshirme túrinde usynylady, alaıda memlekettik derekter bazasynan alynǵan elektrondyq nusqalardy da paıdalaný múmkindigi kózdelgen.

Portal arqyly jiberilgen qujattar «Qandas» avtomattandyrylǵan júıesine túsedi, onda olardy jumyspen qamtý jáne áleýmettik qorǵaý máseleleri jónindegi jergilikti organdar qaraıdy. Ótinish tirkelgennen keıin ótinish berýshi avtomatty habarlama alady. Memlekettik qyzmet tegin kórsetiledi, al mártebe berý týraly sheshim úsh jumys kúni ishinde qabyldanady.

Jańa rásim neǵurlym ashyq bolmaq: eger qujattarǵa qatysty ýájdi eskertýler bolsa, ótinish berýshige aldyn ala bas tartý týraly habarlama jiberilip, onlaın nemese oflaın formatta tyńdaýǵa qatysýǵa shaqyrylady. Tyńdaý eki jumys kúninen keshiktirilmeı ótkiziledi jáne onyń qorytyndysy boıynsha mártebe berý nemese bas tartý týraly túpkilikti sheshim qabyldanady. Qurmetti sebeptermen qatysa almaý jaǵdaıynda tyńdaý basqa kúnge aýystyrylýy múmkin.

Mártebeni uzartý da jeke ótinish negizinde rásimdeledi jáne ol bir ret – alty aıǵa deıingi merzimge júzege asyrylady. Sheshim eki jumys kúni ishinde qabyldanyp, aqparat «Elektrondyq úkimet» júıesi arqyly ótinish berýshige jiberiledi.