Buǵan deıin Almatydaǵy Akademqalashyq turǵyndary úıleriniń mańynda jańa ǵımarat salýǵa qarsy shyqqan bolatyn. Turǵyndardyń bastamashyl tobynyń ýáji boıynsha, bul joba qala qurylysy, ekologıalyq jáne seısmıkalyq talaptarǵa qaıshy. Ýájderin alǵa tartqan bastamashyl top prezıdent atyna úndeý joldaǵan edi.
«Biz bul jobanyń júzege asyrylýyna úzildi-kesildi qarsymyz! Qurylys bizdiń úılerge óte jaqyn jerde júrgizilmek. Jobanyń syzbasyna qaraǵanda, jańa ǵımarattar barlyq bos jerdi túgel alyp qoıady. Bul jer telimi jer silkinisi qaýpi joǵary tektonıkalyq jarylys aımaǵyna tym jaqyn ornalasqan. Sondyqtan buǵan deıin munda qurylys salýǵa ruqsat berilmegen bolatyn. Qazir bul aýmaqta júzden astam aǵash ósip tur.
Ál-Farabı dańǵyly qazirdiń ózinde túrli turǵyn jáne iskerlik keshendermen tyǵyz toly. Bul qalamyzdaǵy negizgi kólik joldarynyń biri. Jańa bıznes-ortalyq salýdyń esh qajeti joq, óıtkeni ol kólik qozǵalysyn odan ári qıyndatyp, ekologıalyq jáne turmystyq jaǵdaıdy nasharlatady», – delingen Akademqalashyq turǵyndarynyń úndeýinde.
Áńgime «Ál-Farabı iskerlik ortalyǵy» dep atalatyn aýqymdy joba týraly bolyp otyr. Jobalyq syzbaǵa sáıkes, bul keshenniń quramyna bıznes-ortalyq, apart-otelder jáne basqa da komersıalyq nysandar kiredi.
Turǵyndar kótergen máselege oraı jýrnalıserge túsinikteme bergen SABA Group KZ kompanıasy basshylyǵy joba qurylysy jaıynda mán-jaıdy táptishtep aıtyp berdi.
SABA Group KZ kompanıasynyń prezıdenti İlıas Karbozovtyń aıtýynsha, bul joba qonaqúı bıznesin damytýǵa baǵyttalǵan ınvestısıalyq jobalar tizimine engizilgen. Joba aıasynda eki deńgeıli úlken jerasty avtoturaǵy bar bıznes-ortalyq salý kózdelgen.
«Bul joba jańa jumys oryndaryn ashyp, shamamen 1 500 adamdy qamtamasyz etedi jáne óziniń erekshe sáýlettik sheshimimen qalanyń kelbetin aıshyqtaıtyn biregeı nysan bolmaq. Jergilikti búdjetke qanshama salyq túsedi», – dedi kompanıa basshysy.
Sondaı-aq, ol atalǵan jer telimi eshqandaı shekteý aımaǵyna kirmeıtinin jetkizdi. «Prezıdent qalanyń joǵarǵy bóliginde, ıaǵnı Ál-Farabı dańǵylynan joǵary aýmaqta qurylys júrgizýge moratorıı engizgen. Almaty qalasy ákimdiginiń 2023 jylǵy №4/727 qaýlysyna sáıkes, bıik ǵımarattar salýǵa bolmaıtyn shekteýli qurylys aımaǵyna Ál-Farabı dańǵylynan joǵary ornalasqan jerler jatady. Bizdiń jer telimimiz qoǵamdyq-iskerlik aımaqqa kiretin bolǵan soń qalanyń bas josparyna saı keledi. Detaldy josparlaý jobasy men jerdiń nysanaly maqsaty da bas josparǵa sáıkes.
Bul telim tektonıkalyq jarylys aımaǵynda ornalaspaǵan. Almaty qalasy boıynsha jarylystar syzbasyna sáıkes, jarylys syzyǵy bizdiń ýchaskemizden joǵaryraq, ıaǵnı «Ál-Farabı» jobasynan ońtústikte ótedi», – dedi İlıas Karbozov.
Rasynda da, Almaty qalasynyń seısmıkalyq jarylystar kartasyna sáıkes, osy aýmaqtaǵy tektonıkalyq jaryq syzyǵy Ál-Farabı dańǵylynan joǵaryraq ótedi. Osy turǵyda kompanıa basshylyǵy turǵyndarmen týyndaǵan daýǵa qatysty ne deıdi?
«Bul jerde turǵyndar degende jalpylama aıtýǵa bolmaıdy. Sebebi, onshaqty adam ǵana narazylyq tanytyp júr. Jeke múddesin qorǵaýǵa tyrysqan olar kompanıaǵa qarsy aqparattyq shabýyl jasap, joba týraly derekterdi burmalap, qoǵam arasynda teris pikir qalyptastyrýǵa umtylýda. Jer telimi akademqalashyqtyń ishinde emes. Biz bolashaqta qurylys jumysy bastalǵanda eskerý úshin ár úıdiń ókilimen kezdesip, qandaı ótinishi, máselesi, suranysy bar ekenin suradyq. Bul jaǵynan tájirıbe jetkilikti, – deıdi.
Kompanıanyń túsindirýinshe, 1,2491 gektardy alatyn jer telimi 2025 jyldyń qazan aıynda qomaqty aqshaǵa satyp alynǵan. Sodan keıin birden turǵyndarmen kezdesý ótkizilip, jobanyń bas jospary tanystyrylypty.
«Qazirgi ýaqytta eshqandaı qurylys-montaj jumystary júrgizilip jatqan joq. Bas jospar men detaldy josparlaý jobasy Almaty qalasy máslıhatynyń sheshimimen bekitilgen. Ýchaske osy bekitilgen josparlarmen jáne nysanaly maqsaty bar qujattarmen birge satyp alyndy. 2025 jyldyń qazan aıynan beri eshqandaı ózgerister engizilgen joq», – dedi Al SABA Group KZ dırektorlar keńesiniń múshesi Qaırat Danıev.
«Bizde dál qazir ruqsat qaǵaz bar dep aıta almaımyz. Jobany ózgertip, qaıtadan saraptamadan ótip, qaýly alamyz. Al jobany 2026 jyldyń birinshi, ekinshi toqsanynda bastap, bir jarym jylda bitiremiz. Kelesi aptada Almaty ákimdiginen ókilder kelip turǵyndarmen kezdesý ótkizedi. Degenmen, qala ákimdigi buǵan deıin bári zańdy ekendigin aıtty», – deıdi.
Aıta ketý kerek, sársenbi kúni ótken brıfıńte Almaty qalasy ákiminiń orynbasary Beıbit Shahanov osy máselege qatysty suraqqa:
«Atalǵan nysan bizdiń barlyq qala qurylysy qujattaryna saı keledi. Qazirgi ýaqytta onyń zańdylyǵyna qatysty eshqandaı kúmán joq. Degenmen, ázirge kompanıa barlyq ótinimderimen tolyq bizge kelip úlgergen joq. Aldyn ala aıtqanda, bul jobany júzege asyrýǵa olardyń quqyǵy bar, óıtkeni ol bizdiń bas jospar men detaldy josparlaý jobasyna (DJJ) sáıkes keledi. Onda keńseler men qonaqúı salý kózdelgen. Sondyqtan turǵyndardyń pikirin jáne bizdiń talaptardy eskere otyryp, bul jobany júzege asyrýǵa quqyǵy bar dep sanaımyz» dep jaýap bergen bolatyn.
